بابری مسجد کیس میں بی جے پی کے کئی اعلیٰ رہنماؤں کو بے قصور قرار دے کر ان کو مقدمے سے بری کئے جانے کے فیصلے پر کئی سیاسی، سماجی و ملی تنظیموں کی جانب سے افسوس کا اظہار کیا جارہا ہے۔
ڈاکٹر سعد بیلگامی سے گفتگو اس تعلق سے ای ٹی وی بھارت سے بات کرتے ہوئے جماعت اسلامی ہند کرناٹک کے صدر ڈاکٹر سعد بیلگامی نے کہا کہ اسپیشل کورٹ کا فیصلہ انصاف کا قتل ہے اور نہایت افسوسناک ہے۔
ڈاکٹر سعد نے بتایا کہ اسپیشل کورٹ کے اس فیصلہ نے عالمی سطح پر بھارت کی شبیہہ بگاڑنے کا کام کیا ہے۔
انہوں نے اس بات پر خوشی کا اظہار کیا کہ نہ صرف اپوزیشن بلکہ ملک کی بیشتر عوام کا مزاج انصاف پسندانہ ہے اور آنے والے دنوں میں یہ ایک بڑی طاقت ہوگی اور انصاف کا قیام ضرور ہوگا۔
ڈاکٹر سعد بیلگامی نے مسلمانوں کو پیغام دیا کہ وہ صبر و تحمل کا مظاہرہ کریں کہ حق و باطل کی جدوجہد ہے اور آخر کار جیت انصاف کی ہوگی۔
