ضلع یادگیر میں کورونا وائرس تیزی سے پھیل رہا ہے۔ جس کو دیکھتے ہوئے ایک مرتبہ پھر ضلع انتظامیہ کی جانب سے ایک ہفتے کے لیے لاک ڈاؤن کا اعلان کیا گیا ہے۔ اشیاء کی خرید و فروخت کے لیے صبح 6 بجے سے ایک بجے تک کا وقت دیا گیا ہے۔
تنظیم المسلمین و بیت المال یادگیر کے صدر لائق حسین بادل نے اس دوران تمام عوام الناس سے اپیل کی ہے کہ وہ اس دوران ضروری اشیاء خرید لیں اور اپنے گھروں میں محفوظ رہیں۔
انہوں نے کہا کہ بلا کسی وجہ کے باہر نہ نکلیں۔ صدر بیت المال نے نہایت افسوس کے ساتھ کہا کہ مسلم محلہ جات میں خاص کر مسلم نوجوانوں کا اکٹھا ایک جگہ غیرضروری جمع ہونا کرونا وائرس کے بچاؤ کے لئے بتائے گئے احکامات پر عمل نہ کرنا سراسر غلط ہے اور غیر ذمہ دارانہ عمل ہے،نوجوانوں کو چاہئے کہ کورونا وائرس کے خاتمے کے لیے حکومت کی جانب سے بتائے گئے احتیاطی اقدامات پر سختی کے ساتھ عمل کریں تاکہ ہم اس کورونا وائرس کو ختم کر سکیں اور اس کی چین کو توڑ سکیں۔
انہوں نے نوجوانوں سے بائیک پر غیر ضروری باہر نہ گھومنے کی بھی اپیل کی۔ صدر بیت المال نے حکومت اور ضلع انتظامیہ کا ساتھ دینے اور لاک ڈاؤن کو کامیاب بنانے کی پرزور اپیل کی۔