مرکز پر درج ایف آئی آر منسوخ کی جائے: امیر شریعت (کرناٹک)

بنگلور میں گزشتہ روز امیر شریعت کی صدارت میں علماء کرام و عمائدین شہر کے علاوہ متعدد تنظیموں کے سربراہان کا ایک اجلاس منعقد کیا گیا جہاں تبلیغی مرکز نظام الدین کے مسئلے کے متعلق گفتگو ہوئی۔

اجلاس کے بعد امیر شریعت مولانا صغیر احمد رشادی نے میڈیا سے خطاب کرتے ہوئے کہا کہ تبلیغی مرکز کے مسئلے پر چند میڈیا کی جانب سے چلائی جارہی زہر افشانی قابل مذمت ہے۔

مولانا صغیر احمد نے کہا کہ بروقت مرکز کے ذمہ داران نے انتظامیہ کو مرکز میں کثیر افراد کی موجودگی کے متعلق نہ صرف آگاہ کیا بلکہ ان کے نقل مکانی کی گزارش بھی کی تھی۔

لہٰذا مرکز کے ذمہ دار مولانا سعد پر درج کی گئی ایف آئی آر نامناسب ہے اور اسے منسوخ کیا جانا چاہئے۔

اس موقع پر مولانا افتخار قاسمی نے سوال کیا کہ حکومت کو ان دیگر تمام سرکاری و غیر سرکاری پروگرامس جو بڑے پیمانے پر انہیں دنوں منعقد کیے گئے تھے ان پر کیوں کارروائی نہیں کی؟

انہوں نے کہا کہ تبلیغی مرکز کو لیکر حکومت اور میڈیا ایک مخصوص دین کے لوگوں کے خلاف نفرت بھڑکا رہی ہے۔

اس موقع پر جماعت اسلامی ہند، جمعیت علمائے ہند و دیگر مقامی تنظیموں کے قائدین نے اجلاس میں شرکت کی۔