All India Ideal Teachers Association بیدر کے سرکاری اسکولوں میں بچوں کے داخلے کیلئے مہم

آل انڈیا آئیڈیل ٹیچرس ایسوسی ایشن شاخ بیدر کے صدر محمد عارف الدین نے میڈیا سے بات کرتے ہوئے کہا کہ نئے تعلیمی سال کے آغاز کے ساتھ ہی آل انڈیا آئیڈیل ٹیچرز ایسوسی ایشن کی جانب سے سرکاری اسکولوں میں بچوں کے داخلے کے لیے خصوصی مہم چلائی جا رہی ہے

بیدر:ریاست کرناٹک کے ضلع بیدر کے ایسے پچھڑے ہوئے یا سلم علاقے جہاں پر تعلیم یافتہ لوگوں کی شرح فیصد کم ہے، کا انتخاب کرتے ہوئے آل انڈیا آئیڈیل ٹیچرز ایسوسی ایشن کے ذمہ داران نے مقامی سرکاری اسکولوں کے صدر مدرسین اور دیگر معلمین کے ساتھ ڈراپ آؤٹ بچوں کی نشاندہی کرنے کے لئے مختلف محلہ جات میں گھر گھر مہم شروع کی ہے۔

آل انڈیا آئیڈیل ٹیچرز ایسوسی ایشن کا مقصد یہ ہے کہ بچے اپنی بنیادی حقوق تعلیم حاصل کرنے سے محروم نہ رہیں۔ انہوں نے کہا کہ شہر کے مختلف علاقوں سے کئی بچوں کو سرکاری مدارس میں داخلہ دلوایا گیا ہے۔

آل انڈیا آئیڈیل ٹیچرس اسو سی ایشن شاخ بیدر کے صدر عارف الدین نے والدین سرپرستوں اور مختلف تنظیموں کے ذمہ داران سے اپیل کرتے ہوئے کہا کہ اپنے اپنے علاقوں میں تعلیم اور اس کی اہمیت سے متعلق لوگوں میں معلومات فراہم کریں اور اپنے نزدیک قریبی سرکاری اسکول میں بچوں کے داخلے دلوا کر آنے والی نسل کو تعلیم کے زیور سے آراستہ کرنے میں نمایاں کردار ادا کریں۔

ٹیچرز ایسوسی ایشن کا کہنا ہے کہ غریب والدین، پرائیویٹ تعلیمی اداروں میں اپنے بچوں کو داخل نہیں کراسکتے کیونکہ ان اسکولوں کی فیس ادا کرنا انکے بس کی بات نہیں ہوتی لیکن ایسے والدین کو چاہئے کہ وہ نزدیکی سرکاری اسکولوں سے رابطہ کریں اور اپنے بچوں کا داخلہ کرائیں۔ انکے مطابق سرکاری اسکولوں میں تعلیم کی وہ سبھی سہولیات موجود ہیں جو نجی تعلیمی اداروں مین ملتی ہین۔

انہوں نے کہا کہ حکومت کی جانب سے سرکاری اسکولوں میں تعلیم حاصل کرنے والے لڑکے اور لڑکیوں کے لئے مختلف اسکیمات و سہولیات رکھی گئی ہیں، ضرورت اس بات کی ہے کہ ہم اپنے بچوں کو اور اپنے اطراف و اکناف کے علاقوں میں تعلیم اور اس کی اہمیت پر زور دیتے ہوئے سرکاری مدارس میں داخلہ کروائیں۔