Karnataka Poll Promises عوام سے کیے گئے پانچوں وعدوں کو منظوری، وزیراعلیٰ سدارامیا

وزیر اعلیٰ کا عہدہ سنبھالنے کے بعد سدارامیا نے کہا کہ کابینہ کی میٹنگ میں عوام سے کیے گئے پانچوں وعدوں کو منظوری دے دی گئی ہے۔ کابینہ کے اگلے اجلاس میں ان پر دوبارہ بحث کی جائے گی اور باضابطہ اعلان کیا جائے گا۔

بنگلورو: چیف منسٹر کی حیثیت سے حلف لینے کے بعد سدارامیا کابینہ کی میٹنگ میں شامل ہوئے۔ اس موقع پر سدارامیا نے بتایا کہ کابینہ کی میٹنگ میں عوام سے کیے گئے پانچوں وعدوں کو منظوری دے دی گئی ہے۔ کابینہ کے اگلے اجلاس میں ان پر دوبارہ بحث کی جائے گی اور باضابطہ اعلان کیا جائے گا۔ ودھان سودھا میں میڈیا بریفنگ سے خطاب کرتے ہوئے انہوں نے بتایا کہ گریہ جیوتی یوجنا کے تحت 200 یونٹ تک بجلی مفت فراہم کی جائے گی۔ اس سے حکومت کو ماہانہ 1,200 کروڑ روپے کا نقصان ہو سکتا ہے۔ گریہ لکشمی یوجنا کے تحت ہم خاندان کی سربراہی کرنے والی ہر خاتون کے کھاتے میں 2,000 روپے جمع کرائیں گے۔ انہوں نے بتایا کہ انا بھاگیہ یوجنا میں ہر بی پی ایل کارڈ ہولڈر کو 10 کلو چاول فراہم کیا جائے گا۔

انہوں نے کہا کہ یوانیدھی یوجنا کے تحت گریجویشن مکمل کرنے کے بعد بے روزگار افراد کو ہر ماہ 3,000 روپے اور یہ دو سال کے لیے دیا جائے گا۔ دریں اثنا، اگر انہیں پرائیویٹ یا سرکاری ملازمت ملتی ہے تو ادائیگی روک دی جائے گی۔ انہوں نے یہ بھی کہا کہ حکومت کرناٹک کی رہنے والی خواتین کو مفت بس پاس دے گی۔ انہوں نے واضح کیا کہ ان پانچوں منصوبوں پر کابینہ کے آئندہ اجلاس میں تفصیلی تبادلہ خیال کیا جائے گا اور سرکاری طور پر ان پر عمل درآمد کیا جائے گا۔