بیدر بلدیاتی انتخابات: مجلس 25 امیدوار کھڑا کرے گی

بیدر شہر میں بلدیاتی انتخابات کے اعلان کے بعد شہر میں مختلف بلدیاتی حلقوں میں مجلس کے ٹکٹ پر الیکشن لڑنے کے لیے لوگوں میں کافی جوش و خروش دیکھنے میں آ رہا ہے۔

ضلع بیدر شاخ کے مجلس اتحاد المسلمین کے صدر سید منصور قادری نے ای ٹی وی بھارت سے بات کرتے ہوئے کہا کہ ہر وارڈ سے تین چار افراد نے ٹکٹ کے لیے خواہش ظاہر کی اور درخواست دی ہے۔ انہوں نے کہا کہ مجلس بیدر بلدیہ کے انتخابات کے لیے 25 امیدوار میدان میں اتار رہی ہے۔

انہوں نے کہا کہ بیدر بلدیہ کے لیے جو 75 درخواستیں آئی ہیں۔ ان تمام کو ہم پارٹی کے صدر اسد الدین اویسی کے پاس روانہ کر چکے ہیں۔ انہوں نے کہا کہ بہت جلد مجلس کے 25 امیدواروں کا اعلان کیا جائے گا۔

مجلس 25 امیدواروں کو اتارے گی

سید منصور احمد قادری نے بیدر کے عوام سے اپیل کرتے ہوئے کہا کہ اب تک آپ نے مختلف سیاسی پارٹیوں کے نمائندوں کو آزمایا ہے۔ اس بار مجلس کے امیدواروں کو اپنا نمائندہ مقرر کریں۔

انہوں نے کہا کہ مجلس وہ پارٹی ہے جو عوام کی خدمت دل سے کرتی ہے، ہر مظلوم اور بے سہارا انسان کا سہارا بنتی ہے۔ اس لیے میں شہر کے عوام سے اپیل کرتا ہوں کہ مجلس کے نمائندوں کو کامیاب بنائیں۔