ریاست کرناٹک کے بنگلور میں ماحولیاتی کارکن دشا روی کو بروز ہفتہ دہلی پولیس نے گرفتار کیا اور دہلی کے ایک کورٹ میں انہیں پیش بھی کیا گیا ہے۔ جس کے بعد انہیں 5 دنوں کے لیے پولیس تحویل میں بھیجا دیا گیا ہے۔
دراصل چند دنوں قبل عالمی شہرت یافتہ ماحولیاتی کارکن گریتا تھنبرگ نے ملک ہند میں چل رہے کسانوں کے احتجاجی تحریک کی حمایت میں ٹویٹ کیا تھا اور ایک "ٹول کٹ" بھی شئیر کیا تھا۔
دشا روی پر الزام عائد کیا گیا ہے کہ انہوں نے گزشتہ 3 مہینوں سے دہلی بارڈرز پر چل رہے کسانوں کے احتجاجی تحریک کے لیے مبینہ طور پر ایک "ٹول کٹ" تیار کیا تھا جس کو مودی حکومت "ملک مخالف دستاویز" قرار دے رہی ہے۔
دشا روی کی گرفتاری کے خلاف آج شہر کے میسور بینک سرکل میں ایک پرزور احتجاج کا انعقاد کیا گیا۔ جس میں کئی سماجی کارکنان و اہم شخصیات نے شرکت کی۔
اس موقع پر احتجاجیوں نے ماحولیاتی کارکن دشا روی کی گرفتاری کی سخت مذمت کرتے ہوئے اسے آئین مخالف ٹھرایا اور ان کی فوری رہائی کی مانگ کی۔
اس احتجاج میں شریک سماجی کارکنان نے بتایا کہ وہ ایک میمورنڈم صدر ہند کو روانہ کر رہے ہیں، اس مانگ کے ساتھ کہ ماحولیاتی کارکن دشا روی کو فوری طور پر رہا کیا جائے۔
