کرناٹک کے انجینئر نے ایجاد کیا مائیکرو لائٹ سی پلین

یہ سی پلین، ہوائی جہاز کی طرح رن وے سے اڑان بھرنے کے بجائے دریا سے اڑان بھرتا ہے

عام طور پر ہوائی جہاز رن وے سے ٹیک آف کرتا ہے لیکن اگر ٹیک آف سمندر یا دریا سے ہو تو پھر یہ تجربہ انتہائی دلچسپ ہوتا ہے۔

کرناٹک کے اُڈوپی کے نوجوانوں نے انوکھا مائیکرو لائٹ سی پلین ایجاد کیا ہے جو پانی پر تیرتا ہے اور آسمان میں اڑ سکتا ہے۔ وزیر اعظم کے ذریعہ خود انحصار بھارت کی اپیل سے متاثر ہو کر اُڈوپی کے نوجوانوں نے سی پلین تیار کیا ہے۔ وزیر اعظم نریندر مودی نے گجرات میں بھارت کے پہلے سی پلین کا افتتاح کیا تھا۔ یہ امپورٹیڈ سی پلین دریائے نرمدا پر کامیابی کے ساتھ تیرتا ہے اور آسمان میں بھی اڑتا ہے۔ اس سی پلین کی طرز پر اُڈوپی کے ہیجامڑی میں دریائے شامبھوی میں کامیابی کے ساتھ تیرتا اور اڑتا ہوا مائیکرو لائٹ سی پلین تیار گیا ہے۔ ہیجامڑی کے نادیکُدرو گاؤں باشندہ پُشپراج نے اس ہلے وزن والے سی پلین کو ایجاد کیا ہے۔

سی پلین کے موجد پُشپراج امین کا کہنا ہے کہ ''میں نے ایئر ماڈلنگ این سی سی انسٹرکٹر کی حیثیت سے کام کیا ہے۔ میں نے ریموٹ کنٹرول یو آئی وی ہوائی جہاز بنایا ہے۔ میرا خواب ایک حقیقی ہوائی جہاز بنانے کا تھا لیکن مجھے لینڈ پلین بنانے کی اجازت نہیں ملی۔ لہذا میں نے سمندری جہاز بنانے کا فیصلہ کیا۔''

ایئر ماڈلنگ اور این سی سی انسٹرکٹر پُشپراج کو اس مائیکرو لائٹ سی پلین بنانے میں دُروتی نامی ایک این جی او کی مدد سے 15 سال کا وقت لگا ہے۔ ایروناٹیکل انجینئرنگ کے طلبا نے اس طیارے کی تیاری کے لئے پُشپراج کے ساتھ کام کیا۔ سی پلین جو پانی پر تیرتا ہے اور وہاں خود ہی ٹیک آف کرتا ہے۔ یہ طیارہ صرف ایک پائلٹ کو ایڈجسٹ کرسکتا ہے۔ تاہم پُشپراج کی خواہش 7 سیٹوں والے سی پلین کو بنانے کی ہے۔

پُشپراج امین کا کہنا ہے کہ ''اگر ہم نے 4 ، 6 یا 10 سیٹر سی پلین تیار کیا تو ہم اسے بہت آسانی سے استعمال کر سکتے ہیں۔ یہ ایک کشتی کے طور پر بھی کام کرتا ہے اور کبھی بھی اسے پانی پر اتارا جا سکتا ہے۔ اس لئے زیادہ زمین کی ضرورت نہیں ہوتی ہے۔ ہم اسے نقل و حمل، دفاع، تربیتی مقصد یا سیاحت کے مقصد کے لئے استعمال کرسکتے ہیں۔''

ایروناٹیکل انجینئرنگ کے طلبا کے پروجیکٹ پر کام کرتے ہوئے پُشپراج نے سی پلین ایجاد کیا ہے جو 190 کلوگرام تک کا وزن لے جا سکتا ہے۔ پشپراج نے ہوائی جہاز گریڈ ایلومینیم، خصوصی نائیلون رسی، نائیلون کپڑا اور 200 سی سی ایٹیلین سیمونینی انجن کا استعمال کر کے اس سی پلین کو تیار کیا ہے۔ اس میں 33 ایچ پی پاور اور 53 انچ لکڑی کا پروپیلر لگایا گیا ہے۔ اسپیڈ پٹرول کے ساتھ یہ سی پلین پانی پر تیزی سے آگے بڑھتا ہے اور اسی رفتار کے ساتھ ٹیک آف بھی کر لیتا ہے۔

اس سی پلین کے پائلٹ ونئے کا کہنا ہے کہ ''میں نے منیپال میں انجینیئرنگ کی تعلیم حاصل کی ہے۔ ہم نے صرف تھیوری پارٹ سیکھا تھا لیکن سر نے ہمیں عملی طور پر تربیت دی۔''

پشپراج نے اس سمندری جہاز کو تیار کرنے میں تقریباً 7 لاکھ روپے خرچ کیے ہیں۔ ایروناٹیکل طلبا کے ساتھ انہوں نے اس سی پلین کو اپنے فارم میں تیار کیا ہے۔ ان کے دوستوں نے بھی سی پلین کو تیار کرنے کے لئے رقم دی ہے۔ پشپراج نے نادوکودرو کے قریب ایک ورکشاپ بنانے کے لئے ریاست اور مرکز سے مالی مدد لی اور ایروناٹیکل طلبا کو اس طرح کے منصوبوں کے لئے حوصلہ افزائی کی۔