گلبرگہ: حضرت خواجہ بندہ نوازؒ کے 617ویں عرس شریف کا سادگی کے ساتھ آغاز

ریاست کرناٹک کے شہر گلبرگہ میں واقع مشہور و معروف درگاہ خواجہ دکن حضرت خواجہ بندہ نواز گیسو درازؒ کا 617واں عرس شریف نہایت سادگی کے ساتھ عمل میں آیا۔

ملک میں پھیلی ہوئی وبا کورونا وائرس کی دوسری لہر کی احتیاطی تدابیر کے پیشِ نظر اور ریاستی حکومت کی جانب سے جاری کی گئی گائڈ لائن کی وجہ سے عبادت گاہ اور درگاہ کو عوام کے لئے کھولنے کی اجازت نہ دینے پر درگاہ کے سجادہ نشین ڈاکٹر خسرو حسینی نے اس سال حضرت خواجہ بندہ نواز گیسو درازؒ کے عرس شریف کو محدود پیمانے پر منایا۔

اس دوران گزشتہ سال کی طرح اس سال بھی قدیم روایت کے مطابق تاریخی محبوب گلشن سے جلوس صندل مبارک نہیں نکالا گیا اور نہ ہی ملک گیر شہرت یافتہ صنعتی نمائش خواجہ بازار کے انعقاد کی اجازت دی گئی۔

حضرت خواجہ بندہ نواز کے 617 ویں عرس شریف کا سادگی کے ساتھ آغاز

قدیم‌ روایت برقرار رکھتے ہوئے صندل مبارک کی کشتیاں صدر صوفہ ڈیوڑھی سجادہ نشین سے برآمد کی گئیں۔ اس سے قبل محفلِ سماع منعقد ہوئی۔ اس موقع پر محبوب بندہ نوازی، تحسین خان قوال نے مبارک باشد پڑھیں اور کلام سنایا۔ فاتحہ خوانی پر محفل سماع کا اختتام ہوا۔

سجادہ نشین صندل مبارک کی کشتیاں اپنے سر پر اٹھاکر درگاہ شریف کے لئے روانہ ہوئے صدر صوفہ سے صندل مبارک کا مختصر جلوس میلاد خوانی کے ساتھ ہوا۔