ٹیلی ویژن کے سیریل کی طرح ہے ایکزٹ پول: ہیمنت -

جھارکھنڈ مکتی مورچہ کے کارگزار صدر ہیمنت سورین نے 2019 کے لوک سبھا انتخابات کے اکزٹ پول کے نتائج کو ٹیلی ویژن پر نشر ہونے والا سیریل قرار دیتے ہوئے کہا کہ یہ ایکزٹ پول برسراقتدار پارٹی کی دکان ہے۔

سورین نے جھارکھنڈ مکتی مورچہ کے صدر شیبو سورین کے ساتھ جاما کے سابق رکن اسمبلی درگا سورین کی سالگرہ پر انہیں خراج عقیدت پیش کرنے کے بعد نامہ نگاروں سے بات چیت میں کہا کہ 2019 کے لوک سبھا انتخابات کے بعد ایکزٹ پول میں جو نتیجے دکھائے گئے ہیں وہ ٹیلی ویژن پر نشر ہونے والے سیریلوں کی طرح ہیں۔

انہوں نے کہا کہ یہ پول مرکز میں برسراقتدار قومی جمہوری اتحاد (این ڈی اے) کی دکان ہے۔

جے ایم ایم کے صدر نے کہا کہ اس انتخابات میں جے ایم ایم اور مہا گٹھ بندھن کے لیڈروں اور کارکنوں نے کافی محنت کی ہے اس لئے ان کی جیت یقینی ہے۔ انہوں نے دعوی کیا کہ 'ہمارا اتحاد اس مرتبہ کے لوک سبھا انتخابات میں بہتر کرے گا۔ اس کے بہترین اثرات آنے والے جھارکھنڈ اسمبلی انتخابات میں بھی نظر آئیں گے۔'