ہیمنت سورین نے امتحانات کے انعقاد سے متعلق مشورہ طلب کیا

ریاست جھارکھنڈ کے وزیر اعلیٰ ہیمنت سورین نے نوجوان طبقہ خاص کر ڈاکٹروں اور انجینئروں سے قومی اہلیتی ٹیسٹ (نیٹ) اور مشترکہ داخلہ ٹیسٹ (جے ای ای۔مین) کے انعقاد سے متعلق مشورہ طلب کیا ہے۔

جھارکھنڈ کے وزیر اعلیٰ ہیمنت سورین نے بتایا کہ ملک میں کورونا انفیکشن کے معاملوں میں آئے دن تیزی آرہی ہے۔ یہ تعداد روزانہ 78 ہزار تک پہنچ چکی ہے۔ ایسے میں ستمبر میں منعقدہ ہونے والے جے ای ای اور نیٹ کے امتحان میں لاکھوں بچوں کی صحت متاثر ہوسکتی ہے۔

وزیر اعلیٰ نے کہا کہ کئی لاکھ بچوں کی صحت کا دھیان مرکزی وزیر تعلیم کو رکھنا چاہئے۔ انہوں نے طلباء کی صحت کے مدنظر ملک کے نوجوان طبقہ خاص کر ڈاکٹروں اور انجینئروں سے ان امتحانات کو منعقد کرنے سے متعلق مشورے طلب کیے ہیں۔

واضح رہے کہ وزیر اعلیٰ مسٹر سورین نے انفیکشن کے مدنظر امتحان کو ملتوی کرنے کے لیے مرکزی وزیر تعلیم کو ایک خط بھی لکھا ہے۔