ہجومی تشدد جھارکھنڈ میں کانگریس کا سیاسی ایجنڈا ہو گا

جھارکھنڈ میں متوقع اسمبلی انتخابات کے دوران کانگریس نے ہجومی تشدد کو سیاسی ایجنڈا بنانے کا اعلان کیا ہے۔

جھارکھنڈ کانگریس کمیٹی میں نو نامزد نائب صدر عرفان انصاری نے ای ٹی وی بھارت سے گفتگو کے دوران بتایا کہ 'جھارکھنڈ میں بی جے پی کی سرکار کھلے عام دھاندلی کر رہی ہے۔ معصوم لوگوں کو موت کے گھاٹ اتارنے والے آزاد گھوم رہے ہیں۔'

عرفان انصاری جھارکھنڈ اسمبلی کے رکن ہیں اور کچھ ماہ قبل وہ اس وقت سرخیوں میں آگئے تھے جب بی جے پی کے ایک وزیر سی پی سنگھ نے عرفان انصاری پر جے شری رام بولنے کے لیے زبردستی کی تھی۔عرفان انصاری نے بتایا کہ 'جھارکھنڈ میں حالات بہت خراب ہیں۔ ہم نے کانگریس کی صدر سونیا گاندھی سے گزارش کی ہے کہ وہ جھارکھنڈ پر توجہ دیں۔'عرفان انصاری نے مزید کہا کہ 'ہجومی تشدد کے خلاف قانون سازی کا وعدہ ہمارے منشور میں شامل ہو گا جس کے لیے ہماری کوششیں جاری ہیں۔'