World's Highest Railway Bridge: دنیا کے بلند ترین ریلوے پل کی ڈیک لانچنگ کا کام مکمل

دنیا کے بلند ترین ریلوے پل کی ڈیک لانچنگ کا کام مکمل ہو گیا ہے۔ اس سلسلے میں ریلوے پُل پر کام کرنے والے افسران اور مزدوروں نے پل پر آج قومی پرچم کشائی کی۔ وہیں یوم آزادی کے موقع پر بھی اس پل پر پرچم کشائی کی جائے گی۔ World's highest Chenab railway bridge deck work completed

ریاسی: جموں و کشمیر کے ضلع ریاسی میں چناب دریا پر بنے والا ریلوے پل دنیا کے بلند ترین ریلوے پل کے نام سے جانا جاتا ہے۔ اس پل پر کام کرنے والی کمپنی نے آج ایک نیا سنگ میل عبور کر لیا ہے۔ آج اس پل کی اوور آرچ ڈیک لانچنگ کا کام گولڈن جوائنٹ کے ساتھ مکمل ہو چکا ہے۔ اس دوران پل پر آزادی کے امرت مہوتسو میں حصہ لیتے ہوئے ترنگا پرچم بھی لہرایا گیا۔ اس پل کی تعمیر کے بعد سرینگر ریل نیٹ ورک کے ذریعے ملک سے جڑے گا۔ World's highest Chenab railway bridge deck work completed

چناب پل میں 93 ڈیک حصے ہیں، جن میں سے ہر ایک کا وزن تقریباً 85 ٹن ہے۔ یہ پل 1315 میٹر لمبا ہے اور یہ دنیا کا سب سے اونچا ریلوے برج ہے جو دریا کی سطح سے 359 میٹر بلندی پر ہے۔ یہ پیرس (فرانس) کے مشہور ایفل ٹاور سے 35 میٹر اونچا ہے۔ پل کی تعمیر میں 28،660 میگا ٹن اسٹیل ، 66،000 کلو گرام کنکریٹ لگا ہے۔

واضح رہے کہ دریائے چناب پر تعمیر ہونے والا یہ ریل برج ادھمپور – سرینگر – بارہمولہ ریل لنک پروجیکٹ کا ایک حصہ ہے۔ یہ برج چناب کے گہرے نالوں کو پار کرنے کے لیے تیار کیا جا رہا ہے اور اس برج کے مین محراب کی لمبائی 467 میٹر ہے۔ اس برج کی اونچائی دریا کی سطح آب سے 359 میٹر ہے جو ایفل ٹاور سے 35 میٹر اونچا ہے۔

متعلقہ حکام کے مطابق یہ برج قریب ڈیڑھ کلو میٹر طویل ہے اور اس کے دونوں طرف اسٹیشن ہوں گے۔ ان کا کہنا تھا کہ سٹیل محرابوں سے بنائے جا رہے اس برج کو 'بلاسٹ پروف' بنایا جا رہا ہے۔

شمالی ریلوے زون کی طرف سے تعمیر ہونے والا 272 کلو میٹر طویل اور 28 ہزار کروڑ روپے کی لاگت والے اودھم پور – سری نگر – بارہمولہ ریلوے لنک پروجیکٹ کشمیر کو ریل کے ذریعہ ملک کے باقی حصوں کے ساتھ جوڑے گا۔ ان 272 کلو میٹر میں سے قاضی گنڈ اور بارہمولہ کے درمیان 118 کلو میٹر، قاضی گنڈ تا بانہال کے 18 کلو میٹر اور اودھم پور سے کٹرہ کے 25 کلو میٹر کا تعمیراتی کام مکمل ہوچکا ہے جب کہ کٹرہ سے بانہال کے 111 کلو میٹر لنک لائن زیر تعمیر ہے۔

سال 1990 کی دہائی میں اس وقت کے وزیر اعظم پی وی نرسمہا راؤ نے کشمیر کے ریل رابطے کے لیے 26 سو کروڑ روپے کے پیکیج کا اعلان کیا تھا جب کہ سال 2002 میں اس وقت کے وزیر اعظم اٹل بہاری واجپائی نے جموں – سری نگر ریل رابطے کو قومی پروجیکٹ قرار دیا تھا۔