Playground In Mandi منڈی میں کھیل کے میدان کی تعمیر کا کام شروع ہونے پر نوجوانوں میں خوشی

جموں و کشمیر کے ضلع منڈی میں محکمہ یوتھ سروسیز اینڈ سپورٹس جموں و کشمیرکی جانب سے پنچائیت سیکلو کے مقام پر نوجوانوں کے کھیل کود کے لئے کھیل کے میدان کی تعمیری کا کام شروع کیا گیا جس کے لیے 43 لاکھ روپے کا بجٹ منظور کیا گیا ہے۔

منڈی: ضلع پونچھ کی تحصیل منڈی کے نوجوانوں کی گزشتہ کئی برسوں سے یہ دیرینہ خواہش تھی کہ نوجوانوں کو کھیل کود کی جانب راغب کرنے کے لیے منڈی میں کھیل کا میدان بنایا جائے تاکہ نوجوانوں کو نشہ کی بری عادتوں سے بچایا جاسکے جس کو دیکھتے ہوئے محکمہ یوتھ سروسیز اینڈ سپورٹس جموں و کشمیر کی جانب سے پنچایت سیکلو کے مقام پر نوجوانوں کے کھیل کود کے لئے کھیل کے میدان کا تعمیری کام شروع کیا ہے۔ جس کے لیے 43 لاکھ روپے کا بجٹ منظور کیا گیا ہے۔

جس میں سے کچھ رقومات واگزار کرکے اس کھیل کے میدان کا کام شروع کیا گیا ہے۔ جس کو لیکر نوجوانوں میں خوشی کی لہر پائی جارہی ہے‌۔ اس حوالے سے نوجوانوں نے کہا کہ اس سے قبل منڈی میں کھیل کا میدان نہ ہونے کی وجہ سے ہم لوگوں کو شدید پریشانیوں کا سامنا کرنا پڑتا تھا جس کی وجہ سے آئے روز نوجوان منشیات میں ملوث ہوجاتے تھے۔ انہوں نے خوشی کا اظہار کرتے ہوئے کہا کہ سرپنچ حلقہ سیکلو عبدالرشید کی کاوشوں کی بدولت کھیل کا میدان بنایا گیا۔

اس موقع پر نوجوانان منڈی اور سرپنچ حلقہ سیکلو نے کہا کہ اس میدان کے تعمیر ہونے سے نوجوان کھیل کی جانب راغب ہوں گے اور نشہ جیسی بری عادتوں سے دور رہیں گے۔ ان کا کہنا تھا کہ س سے قبل نوجوان کرائے پر لوگوں سے جگہ لیکر کھیلتے تھے۔ انہوں نے امید ظاہر کرتے ہوئے کہا کہ اس کھیل کے میدان بننے سے نوجوان اپنی صلاحیت کا لوہا منوائیں گے اور یو ٹی سطح پر اپنے ہنر کا مظاہرہ کریں گے۔

سرپنچ نے انتظامیہ سے اپیل کرتے ہوئے کہا کہ اس کھیل کے میدان کو جلد از جلد پایا تکمیل تک پہنچایا جائے اور اس میدان کے مزید کام کے لیے رقومات واگزار کی جائیں تاکہ نوجوان نسل اس کھیل کے میدان سے استفادہ حاصل کرسکیں۔