سرینگر جموں شاہراہ آج بند رہے گی

محکمہ موسمیات کی جانب سے سرینگر - جموں شاہراہ پر زمین کھسکنے اور چٹانین گر آنے کے امکانات کی پیشگوئی کو مد نظر رکھتے ہوئے حکام نے آج شاہراہ پر ٹریفک بند رہنے کے احکامات صادر کئے ہیں۔

سرینگر - جموں قومی شاہراہ پر پنتھال کے مقام پر رکاوٹیں حائل ہونے اور محکمہ موسمیات کی پیشگوئی کو مد نظر رکھتے ہوئے حکام نے آج شاہراہ ٹریفک کے لیے بند رکھنے کے احکامات صادر گئے ہیں۔

پیر کو ضلع رام بن میں پنتھال کے مقام پر رکاوٹیں حائل ہونے کے بعد سرینگر - جموں شاہراہ پر ٹریفک کی نقل و حمل متاثر ہوئی، اور محکمہ موسمیات کی پیشگوئی کو مد نظر رکھتے ہوئے حکام نے منگل (23مارچ) کو شاہراہ بند رکھنے کا فیصلہ لیا ہے۔

محکمہ ٹریفک کے ایک عہدیدار نے بتایا کہ ’’کل (23مارچ کو) سرینگر - جموں قومی شاہراہ پر نہ کسی کو وادی سے جموں اور نہ ہی جموں سے سرینگر کی طرف جانے کی اجازت دی جائے گی۔‘‘

انہوں نے کہا کہ محکمہ موسمیات کی جانب سے شاہراہ پر بعض مقامات پر زمین کھسکنے اور چٹانین گر آنے کے امکانات کی پیش گوئی کو مد نظر رکھتے ہوئے منگل کو شاہراہ احتیاطی طور بند رکھنے کا فیصلہ لیا گیا ہے۔

انہوں نے مزید کہا کہ شوپیاں ضلع کو جموں کے پونچھ ضلع سے جوڑنے والی مغل شاہراہ کو برف باری کے باعث بند رکھا گیا ہے۔

ادھر تازہ برفباری کی وجہ سے شمالی کشمیر میں کپوارہ - کرناہ اور بانڈی پورہ - گریز سڑک کو بھی ٹریفک کی نقل و حمل کے لیے بند رکھا گیا ہے۔