موجودہ کان کنی کی پالیسی واپس لی جائے: سی پی آئی ایم

ریت، پتھر، بجری وغیرہ جیسے تعمیراتی سامان کی مہنگائی سے عوام میں تشویش پیدا ہو گئی ہے اور متعدد افراد نے تعمیراتی کام روک دیا ہے۔

جموں و کشمیر میں جیولوجی اور کان کنی کی موجودہ پالیسی کی واپسی کا مطالبہ کرتے ہوئے سی پی آئی (ایم) کے سیکریٹری غلام نبی ملک نے ہفتہ کو کہا کہ اگر اس پالیسی کو واپس نہیں لیا گیا تو اس سے پورے خطے کے ہزاروں افراد کی روزی روٹی متاثر ہو سکتی ہے۔

اپنے ایک بیان میں ملک نے کہا کہ ٹھیکیداروں سے لے کر ریت نکالنے والے، مزدور اور ٹرانسپورٹرز جو معدنیات کی کھدائی سے براہ راست یا بالواسطہ طور پر وابستہ ہیں کو اپنی روزی کھو جانے کا خطرہ ہیں۔

کان مالکان، کریشر مالکان، ٹپر اور ٹریکٹر مالکان، ہاٹ مکس پلانٹ مالکان، کاری گر اور دیگر متعلقہ افراد کے کاروبار کو خطرہ لاحق ہوگیا ہے۔ اس تجارت سے وابستہ لوگوں نے بینکوں سے قرض لے کر لوڈ کیریئر، ٹپر اور دیگر گاڑیاں خرید لی ہیں۔ اب اس نئی پالیسی کے نفاذ کے ساتھ وہ بے روزگار ہوگئے ہیں، کیونکہ وہ بینکوں کو ماہانہ EMI ادا کرنے کے قابل بھی نہیں ہیں۔

نئی پالیسی کا نتیجہ روزگار میں شامل افراد کو نہ صرف بے روزگاری کا باعث بنے گا بلکہ اس سے آبی ذخیروں سے معدنی وسائل کا بڑے پیمانے پر استحصال ہوگا۔ پالیسی میں حفاظتی تدابیر کی کمی نے نہ صرف ہزاروں خاندانوں کو اپنی معاش سے محروم کردیا ہے بلکہ صارفین کو کان کنی سنڈیکیٹ کے ذریعہ استحصال سے بھی دوچار کردیا ہے۔

اس پالیسی نے اس وقت تعمیراتی سامان کی شدید قلت پیدا کردی ہے جب سخت سردی کے بعد کشمیر میں ابھی ترقیاتی کام کی شروعات ہوئی تھی۔ ریت، پتھر، بجری وغیرہ جیسے تعمیراتی سامان کی مہنگائی سے عوام میں تشویش پیدا ہو گئی ہے اور متعدد افراد نے تعمیراتی کام روک دیا ہے۔

صرف جموں و کشمیر کے مقامی لوگوں کو بھی پچھلے سالوں کی طرح نکالنے کی سرگرمیوں کو جاری رکھنے کی اجازت ہونی چاہئے کیونکہ اس سے وابستہ ہزاروں افراد کی معاش کا تحفظ کیا جاسکتا ہے۔