جموں (جموں کشمیر) :حالیہ دنوں ہوئی بارشوں اور ژالہ باری کے سبب جموں ضلع کے مضافاتی علاقوں خاص کر بین الاقوامی سرحد کے قریب فصلوں کو شدید نقصان پہنچا ہے۔ ای ٹی وی بھارت کے ساتھ بات کرتے ہوئے کسانوں نے دعویٰ کیا کہ بارشوں، ژالہ باری کے سبب تقریباً 80 فیصد فصلوں، جن میں دھان کی فصل قابل ذکر ہے، کو نقصان پہنچا ہے، جس سے کسان پریشان ہو گئے ہیں اور ہونے والے نقصانات سے نمٹنے کے لیے جد و جہد کر رہے ہیں۔
کسانوں کا کہنا ہے گزشتہ دنوں ہوئی غیر متوقع اور موسلا دھار بارشوں اور ژالہ باری نے دھان کاص کر باسمتی کی فصل کو تباہ کر دیا ہے۔ انہوں نے مزید کہا کہ ’’رہی سہی کسر تیز ہواؤں نے پوری کر دی اور فصلیں تباہ ہو گئیں جس کے سبب غریب کسان کی سال بھر کی محنت پر پانی گیا ہے۔‘‘ کسانوں کا کہنا ہے کہ گزشتہ برس بھی اسی طرح بارشوں کے سبب فصلوں کو نقصان پہنچا تھا جس کے بعد انتظامیہ نے کسانوں کو معاوضہ فراہم کیا تھا تاہم اس بار کوئی بھی آفیشل معائنہ کرنے بھی نہیں آیا۔