لاک ڈاؤن میں مزدور پریشان

جموں توی ریلوے اسٹیشن پر کام کرنے والے مزدوروں کا کہنا ہے کہ مارچ کے مہینے سے کام بند ہونے کے باعث دو وقت کی روٹی ملنا بھی محال ہو گیا ہے۔

کورونا وائرس کا پھیلاؤ روکنے کے لئے ملک کے ساتھ ساتھ جموں و کشمیر میں بھی لاک ڈاؤن نافذ کیا گیا، ایسے میں یہاں کے مزدور بھی پریشان ہیں۔

کورونا وائرس کے پیش نظر لاک ڈاؤن کے باعث جموں ضلع میں واقع جموں توی ریلوے اسٹیشن پر غریب مزدور دیہاڑی دار طبقے کو شدید پریشانی کا سامنا کرنا پڑ رہا ہے، کام نہ ہونے کے باعث نوبت فاقوں تک پہنچ گئی ہے۔

چہرے پر مایوسی، آنکھوں میں بے چینی لئے کسی مسیحا کے منتظر مزدور دیہاڑی دار طبقے کو لاک ڈاؤن نے بری طرح متاثر کیا ہے، جن کے گھروں میں کام بند ہونے سے فاقے پڑ گئے ہیں۔

توی ریلوے اسٹیشن پر کام کرنے والے مزدوروں کا کہنا ہے کہ مارچ کے مہینے سے کام بند ہونے کے باعث دو وقت کی روٹی ملنا بھی محال ہو گیا ہے، جبکہ سرکار نے آج تک ان کی مدد نہیں کی۔ انہوں نے سرکار سے اپیل کی کہ جس طرح سے دیگر گاڑیوں کو بحال کیا گیا ہے اسی طرح ٹرین سروسز کو بھی بحال کیا جائے، تاکہ ان کو بے روزگاری سے دو چار نہ ہونا پڑے۔

مذدوروں کا کہنا ہے کہ حکومت کو غریب مزدور دیہاڑی دار طبقے کے لئے فوری حکومتی امداد اور روز گار کے حوالے سے محفوظ اقدامات کرنے کی ضرورت ہے۔