عید الاضحی کے پیشِ نظر ناجائز منافع خوروں کی لگام کسنے کے لیے جموں میں انتظامیہ نے مارکیٹ چیکنگ کے لیے خصوصی ٹیم تشکیل دی ہے۔
آفیشلز کے مطابق گراں فروشی اور غیر معیاری اشیاء کی فروخت کی شکایات موصول ہونے کے بعد انتظامیہ نے عید کے پیشِ نظر صارفین کو راحت پہنچانے کے لیے خصوصی ٹیمیں مارکیٹ چیکنگ کے لیے روانہ کردی ہیں۔
انہوں نے کہا کہ ٹیمیں جموں کے مختلف بازاروں کا معائنہ کرکے معیاری اشیاء کی خرید و فروخت اور مقررہ نرخ ناموں کے مطابق ہی اشیاء فروخت کرنے کو یقینی بنائیں گے۔
مزید پڑھیں:جموں: کرائے میں اضافے سے مسافر پریشان
ٹیموں کو ہدایت دی گئی ہے کہ مقررہ ریٹ لسٹ سے زائد رقم وصول کرنے والے دکانداروں اور غیر معیاری اشیاء فروخت کرنے والوں کے خلاف قانونی کارروائی عمل میں لائی جائے گی، تاکہ صارفین کو عید الاضحیٰ کے مقدس موقع پر مسائل و پریشانیوں کا سامنا نہ کرنا پڑے۔
دریں اثناء انتظامیہ کی جانب سے دکانداروں سمیت عوام الناس کو عید کے پیشِ نظر وضع کیے گئے رہنما خطوط پر سختی سے عمل کرتے ہوئے ماسک پہننے اور بھیڑ بھاڑ جمع کرنے سے پرہیز کرنے کی تلقین کی گئی ہے۔