سترہ ہزار پی ایم اے وائی جی کے بے زمین قبائلی مستحقین کو پانچ مرلہ زمین ملے گی: ایل جی

جن جاتیہ گورو سپتاح منانے کے لیے منعقدہ ایک تقریب سے خطاب کرتے ہوئے جموں و کشمیر کے لیفٹیننٹ گورنر منوج سنہا نے کہا کہ انتظامیہ جموں و کشمیر میں قبائلی آبادی کو ترقی کے مساوی فوائد حاصل کرنے کو یقینی بنانے کے لیے پرعزم ہے۔ اپنے خطاب میں لیفٹیننٹ گورنر نے گذشتہ چند برسوں میں قبائلی برادریوں کی فلاح و بہبود اور ترقی کے لیے انتظامیہ کی کوششوں کے بارے میں بات کی۔ LG announcement

جموں: جموں و کشمیر کے لیفٹیننٹ گورنر منوج سنہا نے جمعہ کو اعلان کیا کہ ان کی انتظامیہ آنے والے دنوں میں پردھان منتری آواس یوجنا (دیہی) کے 17,000 بے زمین قبائلی استفادہ کنندگان کو پانچ مرلہ زمین دے گی۔ انہوں نے یہ اعلان جموں کے کنونشن سنٹر میں 'ٹرائبل پرائیڈ ویک' کی تقریب میں کیا۔

منوج سنہا نے کہا کہ انتظامیہ نے یہ فیصلہ کیا ہے کہ پانچ مرلہ زمین ان لوگوں کو دی جائے گی، جو پردھان منتری آواس یوجنا کے اہل ہیں اور جن کے پاس اپنی زمین نہیں ہے۔ انہوں نے کہا کہ تمام قبائلی برادریوں کے حقوق اور فوائد کا تحفظ انتظامیہ کی اولین ترجیح ہے۔ منوج سنہا نے کہا کہ فیبل پلان کے تحت فراہم کیے جانے والے مکانات سے میں واقف ہوں۔ تقریباً 17000 لوگ ہیں۔ خاص کر بکروال بھائی۔ باقی ہماری برادری کے لوگ ہیں جن کے پاس زمین نہیں ہے۔ میں یقین دلانا چاہتا ہوں کہ جموں و کشمیر انتظامیہ آنے والے دنوں میں تمام اہل لوگوں کو پانچ مرلہ اراضی فراہم کرے گی، تاکہ ان کا اپنا گھر بنانے کا خواب پورا ہو سکے۔

واضح رہے ایل جی انتظامیہ پورے جموں کشمیر میں ناجائز تجاوزات ہٹاؤ مہم چلا رہا ہے۔ اس مہم میں انتظامیہ اراضیوں کو اپنے قبضے میں لے رہا ہے۔ وہیں، انتظامیہ کی جانب سے ٹیرر فنڈنگ اور منشیات اسمگلنگ کے ملزمین کی جائیدادوں کو بھی ضبط کیا جارہا ہے۔ حکومت کا منصوبہ ان اراضیوں کو پردھان منتری آواس یوجنا کے تحت استعمال میں لانے کا ہے۔