جموں کشمیر ہوم گارڈز کا کہنا ہے کہ ہر مشکل وقت میں محکمہ ان کی خدمات حاصل کرتا ہے تاہم ان کی تنخواہ میں متعدد دفعہ اضافے کا وعدہ کیا گیا لیکن آج تک اضافہ نہیں کیا گیا۔
دو ہزار سات سو روپے کی تنخواہ پر ہوم گارڈ کی ڈیوٹی انجام دینے افراد کو زندگی گزر بسر کے لیے کافی مشکلات کا سامنا کرنا پڑتا ہے۔
ہوم گارڈ کے ان جوانوں کے مطابق کورونا وبا کے دوران بھی ان کی خدمات حاصل کی جارہی ہیں لیکن حکومت کی جانب سے ان کو ماسک اور سینٹائزر فراہم نہیں کیے گئے ہیں۔
گارڈ ملازمین کا مطالبہ ہے کہ دیگر ریاستوں اور یونین ٹریٹریز کی طرح پورے ماہ ان کی ڈیوٹی لگائی جانے کے ساتھ ساتھ ان کی تنخواہوں میں اضافہ کیا جائے تاکہ وہ اپنے اہل خانہ اور بچوں کی بہتر پرورش کر سکیں۔
واضح رہے کہ جموں و کشمیر میں ہوم گارڈ نوجوانوں کو مہینے میں محض نو دن ہی ڈیوٹی انجام دینے کے لیے محکمہ کی جانب سے بلایا جاتا ہے اور باقی اکیس دن خالی بیٹھے رہتے ہیں۔
