جموں: یوم جمہوریہ کے موقع پردو روزہ کل ہند مشاعرہ 27 جنوری سے

27 جنوری کو ہونے والے آل اِنڈیا مشاعرے میں معزز شعراء، جن میں وسیم بریلوی، منظر بھوپالی، نواز دیوبندی، کنور جاوید، خوشبو شرما سمیت اور بھی شعراء شامل ہیں۔

جموں و کشمیر اکادمی برائے فن، ثقافت اور لسانیات، ریڈیو مرچی کے اشتراک سے 27 اور 28 جنوری کو جموں میں 72ویں یوم جمہوریہ کے موقع پر دو روزہ کوی سمیلن و مشاعرہ کا انعقاد کیا جائےگا۔

اس پروگرام میں ملک کے معروف ہندی اور اُردو زبانوں سے تعلق رکھنے والے شعراء کے علاوہ بالی ووڈ کے معروف گلوکار اور مصنفین شرکت کریں گے۔

اس موقع پر سیکرٹری جموں و کشمیر اکادمی برائے فن، ثقافت اور لسانیات منیر الاسلام نے پریس کانفرنس سے خطاب کرتے ہوئے کہا کہ اس ایونٹ کا اِنعقاد جموں یونیورسٹی کے زوآور سنگھ آڈیٹیوریم میں کیا جائے گا اور جموں و کشمیر کے اعلیٰ شخصیات سے توقع کی جا رہی ہے کہ وہ اس پہلے قومی ایونٹ میں شرکت کریں۔

انہوں نے کہا کہ ہم ان تقاریب میں جموں و کشمیر کے نوجوانوں کو پلیٹ فارم بھی فراہم کر رہے ہیں۔ اس موقع پر ریڈیو مرچی ایک شاعری مقابلہ بھی منعقد کرنے جا رہی ہے اور جموں و کشمیر کے 450 نوجوانوں نے اس میں حصہ لینے کے اپنے نام اندراج کرایا ہے۔

انہوں نے بتایا کہ ہر اندراج کے بارے میں فیصلہ کرنے کے بعد اردو اور ہندی زبانوں سے تعلق رکھنے والے 10 نوجوان شاعروں کو منتخب کیا گیا ہے تاکہ وہ تقریب کے دوران اپنا کلام پیش کر سکیں اور سینئر شعراء کے ساتھ تبادلہ خیال کریں۔

اُنہوں نے کہا کہ ہم نے اس قومی تقاریب میں نوجوان شاعروں کو شامل کیا ہے، جن کی شاعرانہ تخلیقات ریڈیو مرچی کی مدد سے منعقدہ مقابلے میں بہترین قرار دی گئیں ہیں۔27 جنوری کو آل اِنڈیا مشاعرے میں معزز شعراء، جس میں وسیم بریلوی، منظر بھوپالی، نواز دیوبندی، کنور جاوید، خوشبو شرما سمیت اور بھی شعراء شامل ہوں گے۔

اُنہوں نے مزید کہا کہ 28 جنوری کو کوی سمیلن کا انعقاد کیا جائے گا، جس میں سنیل جوگی، جگدیش سولنکی، سودیپ بھولا، ششی کانت یادو، وشنو سکسینا حصہ لیں گے۔