سرینگر: جموں و کشمیر میں بین الاقوامی یوگا ڈے کے موقعے پر منعقد ہونے والے پروگراموں میں لوگوں نے جوش و خروش سے حصہ لیا۔ لیفٹیننٹ گورنر منوج سنہا نے سرینگر میں یوگا پروگرام کا افتتاح کیا۔ جموں میں منعقد پروگرام میں مرکزی وزیر جتیندر سنگھ نے تمام لوگوں سے یوگا کا اہتمام کرنے کی اپیل کی۔ بین الاقوامی سرحد اور لائن آف کنٹرول پر فوجیوں اور ضلع ہیڈ کوارٹر میں یوگا سے متعلق مختلف پروگرامز منعقد کیے گیے۔ دوسری جانب ضلع پونچھ میں یوگا کے عالمی دن کے موقع پر راجیہ سبھا کے رکن غلام علی کھٹانہ کی قیادت میں طلباء، اساتذہ اور دیگر نے یوگا کیا۔
اس موقعے پر ایل جی منوج سنہا نے کہا کہ لوگوں کو9ویں بین الاقوامی یوگا ڈے کی مبارکباد دی۔ انہوں نے کہا کہ جسم اور دماغ کو ایک ساتھ حرکت میں لانے کا بہترین اور واحد طریقہ یوگا ہے۔ میں سب سے گزارش کرتا ہوں کہ یوگا کو اپنا حصہ بنائیں۔ تناؤ سے پاک اور صحت مند زندگی کے لیے روزانہ کا معمول بنائیں۔ انہوں نے مزید کہا کہ عظیم بابا مہارشی پتنجلی نے مشاہدہ کیا ہے کہ ہمارے جسم کے دماغ میں خرابی، بے چینی، جسم میں سوزش اور دل کی بیماریوں کی بنیادی وجہ تناؤہے۔ یوگا ہمارے جسم اور دماغ کے درمیان ہم آہنگی لاتا ہے اور تناؤ کو کم کرتا ہے۔
یوگا ڈے کا اہتمام انتظامیہ کی جانب سے محکمہ آیوش کے تعاون سے بھارت پاکستان لائن آف کنٹرول سے متصل ضلع ہیڈ کوارٹر کے اسپورٹس گراؤنڈ میں کیا گیا۔ اس میں راجیہ سبھا رکن پارلیمان غلام علی کھٹانہ اور ڈی ڈی سی چیئر پرسن تاجم اختر، کمشنر یاسین ایم چودھری کی قیادت میں اسکولی بچوں، اساتذہ، کھلاڑیوں اور انتظامی افسران کی بڑی تعداد نے کرو یوگا، رہو نیروگ کا پیغام دیا۔ رکن پارلیمان غلام علی کھٹانہ نے کہا کہ وزیر اعظم نریندر مودی نے پوری دنیا کو یوگا کا پیغام دیا ہے۔ آج پوری دنیا ہندوستانی ثقافت کو اپناتے ہوئے ہمارے ساتھ یوگا کو اپنا رہی ہے۔ ریاسی میں یوگا ڈے کے موقع پر ضلع انتظامیہ کے افسران، ڈی ڈی سی چیئرمین، اساتذہ اور مختلف اسکولوں کے طلباء نے اسپورٹس اسٹیڈیم میں مل کر یوگا کیا۔ لوگ صبح سے ہی موقع پر جمع ہونا شروع ہو گئے۔
مزید پڑھیں:۔International Yoga Day 2023 آج دنیا بھر میں یوم یوگا کا اہتمام
وہیں ادھم پور اور کٹھوعہ اضلاع میں بھی یوگا ڈے کے موقع پر کئی پروگرامز منعقد کیے گئے ہیں۔ انتظامیہ کی جانب سے منعقد کیے جانے والے پروگراموں میں بڑی تعداد میں لوگ شرکت کر رہے ہیں۔ ریاسی ضلع میں بین الاقوامی یوگا ڈے پر ایک پروگرام منعقد کرکے اجتماعی طور پر یوگا کیا گیا۔ ضلع انتظامیہ کی جانب سے شہر کے مقامی اسپورٹس اسٹیڈیم میں صبح یوگا پروگرام کا انعقاد کیا گیا۔ اس میں انتظامی افسران کے علاوہ مختلف دفاتر کے افسران اور ملازمین نے شرکت کی۔ ڈائٹ اسکلڈ انڈیا مشن کے تحت جاری عوامی شراکت کے پروگرام میں یوگا بھی کیا گیا۔ راج ہائر سیکنڈری اسکول میں یوگا کی مشق ہوئی۔ این سی سی افسر امیت گپتا کی نگرانی میں این سی سی کیڈٹس نے یوگا کیا۔ اس میں این سی سی کے 50 کیڈٹس نے حصہ لیا۔ سلال پروجیکٹ کے دائرہ اختیار والے علاقے جیوتی پورم میں این ایچ پی سی کے ذریعہ یوگا ڈے منایا گیا۔
آزادی کا امرت مہوتسو کے زیراہتمام گورنمنٹ ڈگری کالج، نیلی نالہ، ادھم پور کے این ایس ایس یونٹ نے یوگا کے عالمی دن کے موقع پر یوگا فار ہیومینٹی کے موضوع پر دو روزہ ورکشاپ کا آغاز کیا۔ جس میں تھیوری سیشن، پریکٹیکل سیشن، پوسٹر سازی اور سلوگن تحریری مقابلہ بھی منعقد کیا گیا۔ پروگرام کا افتتاح پرنسپل، یوگا ماہرین، عملے کے ارکان اور طلباء نے کیا۔ اس کے بعد طلباء سے خطاب کرتے ہوئے کالج کے پرنسپل پروفیسر ہنس راج نے کہا کہ یوگا کا عالمی دن منانے کا مقصد یوگا کی قدیم مشق اور جسمانی و ذہنی صحت پر اس کے مثبت اثرات کے بارے میں بیداری پیدا کرنا ہے۔
سینٹرل یونیورسٹی آف جموں کے شعبہ یوگا اسسٹنٹ پروفیسر ڈاکٹر رنجنا ورما اور رشمی کھجوریا نے مختلف یوگا پوز کا مظاہرہ کیا۔ انہوں نے کپل بھارتی، پرانایام، سنکلپ اور مراقبہ کے بارے میں بتایا۔ انہوں نے تمام طلباء کو مختلف قسم کے آسنوں اور مراقبہ میں مشغول ہونے کی ترغیب دی۔ پرنسپل نے عملے کے ارکان (تعلیمی اور غیر تدریسی) اور طلباء کے ساتھ مل کر مختلف یوگا آسنوں کا مظاہرہ کیا۔ اس کے علاوہ طلباء نے روز مرہ کی زندگی میں یوگا کے فوائد کو بیان کرنے والے پوسٹر اور نعرے بھی دکھائے۔ اس موقع پر ڈاکٹر رادھا رانی اور ڈاکٹر سواتی دت اور دیگر موجود تھے۔
