جموں: کووڈ کے بڑھتے معاملات کے پیش نظر انتظامیہ متحرک

جموں میں کورونا وائرس کے کیسز میں مسلسل تیزی سے اضافہ ہو رہا ہے۔ انتظامیہ نے سرکاری و نجی ہسپتالوں میں معمول کے مطابق چل رہی سرجری کو ملتوی کرنے کا حکم جاری کیا ہے۔

کمشنر جموں کی جانب سے جاری کردہ ایک حکم نامہ میں کہا گیا ہے کہ کورونا وائرس جیسی مہلک وبا کو دیکھتے ہوئے انتظامیہ اس وقت وائرس سے نمٹنے کے لئے اپنے تمام وسائل کا استعمال کررہا ہے جبکہ ہسپتالوں سے دباﺅ کم کرنے کے لئے مریضوں کے چھوٹے اور معمولی آپریشن ملتوی کیے گئے ہیں۔

حکمنامہ میں مزید یہ بھی کہا گیا ہے کہ 'ایمرجنسی سہولیات مریضوں کے لئے معمول کے مطابق ہی دستیاب رکھی جائیں گی'۔

کمشنر نے تمام ضلع ترقیاتی کمشنروں کو حکم جاری کرتے ہوئے کہا کہ 'وہ ہیلتھ کے نظام کو بہتر بنانے کے لئے مستعدی کے ساتھ ہسپتال کا معائنہ کریں تاکہ مشکل وقت میں بھی شعبہ کے کام کاج کو صحیح طریقے سے کیا جا سکے۔'