Surrender Unlicensed Guns جموں میں غیر لائسنسی بندوق جمع کرانے کی ہدایت

ڈرون بیچنے یا خریدنے پر مکمل پابندی عائد کیے جانے کے بعد اب جموں میں بغیر لائسنس بندوق فوری طور نزدیکی پولیس اسٹیشن میں جمع کرانے سے متعلق ہدایت نامہ جاری کیا گیا ہے۔

جموں (جموں و کشمیر) :جموں و کشمیر کی سرمائی دارالحکومت جموں ضلع کی خاتون ڈپٹی کمشنر اونی لواسا نے لوگوں بالخصوص جموں ضلع میں رہائش پذیر عوام سے کہا کہ وہ 10 دن کے اندر اندر بغیر لائسنس کے اسلحہ نزدیکی پولیس تھانے میں جمع کرائیں۔ انہوں نے کہا کہ ایسا نہ کرنے والے افراد قانونی کارروائی کا سامنا کرنے کے لئے تیار رہیں۔

ڈپٹی کمشنر جموں کی جانب سے جاری کردہ نوٹس کے مطابق اسلحہ جمع کرنے کی ہدایت پہلے بھی کی گئی تھی، جن کے لائسنس-UIN NDAL پر اپ لوڈ نہیں کیے گئے تھے یا ایس ڈی ایم/تحصیلداروں کے ذریعہ جاری کیے گئے تھے یا کسی بھی وجہ سے تجدید (رینیو) نہیں کیے گئے تھے اور اب ضلع ترقیاتی کمشنر دفتر کی نوٹس میں آیا ہے کہ اسلحہ لائسنسز میں متذکرہ تضادات کے باوجود اب بھی بہت سے لوگوں نے اسلحہ جمع نہیں کیا ہے۔

بغیر لائسنس بندوق سرینڈر کیے جائیں، ڈی سی جموں

حکم نامہ میں مزید لکھا گیا ہے کہ ’’کسی بھی ایسے شخص کو آخری موقع دیا جاتا ہے جس کے پاس کوئی بھی ایسا ہتھیار ہو - جس کا اس کے پاس اسلحہ لائسنس نہیں ہے - کہ وہ دس دن کی مدت کے اندر اندر اپنا اسلحہ متعلقہ پولیس تھانے میں جمع کرائے، ورنہ سخت قانونی کاروائی انجام دی جائے گی۔‘‘ قابل ذکر ہے کہ اس سے قبل جموں ضلع ترقیاتی کمشنر، اونی لواسا، نے جموں ضلع میں نجی طور پر ڈرون کے استعمال پر بھی پابندی عائد کی تھی اور جموں ضلع میں ڈرون بیچنے یا خریدنے پر بھی مکمل پابندی عائد ہے۔ ڈرونز کا اکثر استعمال لوگ شادی، بیاہ یا سیر تفریح کے لئے استعمال کرتے تھے۔