'جمہوریت کی بحالی کو جموں و کشمیر میں یقینی بنایا جائے'

جموں و کشمیر کی کمیونسٹ پارٹی آف انڈیا کے جنرل سیکریٹری اور سابق ایم ایل اے محمد یوسف تاریگامی سے ای ٹی وی بھارت کے نمائندہ نے خاص بات چیت کی۔

عوامی اتحاد برائے گپکار اعلامیہ نے جموں و کشمیر میں ڈسٹرکٹ ڈیولپمنٹ کونسل (ڈی ڈی سی) کے انتخابات متحد ہو کر لڑنے کا اعلان کیا تھا۔ اس ضمن میں ای ٹی وی بھارت نے کمیونسٹ پارٹی آف انڈیا کے جنرل سیکریٹری اور سابق ایم ایل اے محمد یوسف تاریگامی سے بات کی۔

محمد یوسف تاریگامی نے کہا کہ 'ہم تفرقہ ڈالنے والی طاقتوں کو جمہوری سپیس پر حملہ آور ہونے کی اجازت نہیں دے سکتے جس کی بنا پر عوامی اتحاد برائے گپکار اعلامیہ کے ممبران نے یہ فیصلہ کیا کہ ہم ان انتخابات میں شمولیت اختیار کریں گے۔'

انہوں نے مرکزی سرکار کو تنقید کا نشانہ بناتے ہوئے کہا کہ انہوں نے جموں و کشمیر کو حاصل خصوصی آئینی حیثیت کو ختم کر کے جموں و کشمیر میں ڈاکہ زنی کی ہے۔'

انہوں نے کہا کہ 'عوامی اتحاد برائے گپکار اعلامیہ کا اتحاد جموں و کشمیر کو حاصل خصوصی آئینی حیثیت واپس لانے کے لئے بنایا گیا۔ انہوں نے کہا کہ جمہوریت کی بحالی کو جموں و کشمیر میں یقینی بنایا جائے اور جموں و کشمیر میں اسمبلی انتخابات منعقد کرائے جائے۔