مسعود اظہر کو عالمی دہشت گرد قرار دینے پر جشن

جیش محمد کے سربراہ مسعود اظہر کو اقوام متحدہ کی جانب سے عالمی دہشت گرد قرار دیا گیا۔

نمائندے کے مطابق جموں کے رانی پارک علاقے میں ’’ڈوگرہ فرنٹ‘‘ نے جیش محمد کے سربراہ مسعود اظہر کو عالمی دہشت گرد قرار دیے جانے پر جشن منایا اور زبردست نعرے بازی کی۔

ڈوگرہ فرنٹ کے صدر راکیش گپتا نے ذرائع ابلاغ کے نمائندوں سے بات کرتے ہوئے کہا کہ ’’بھارت میں آج خوشی کی لہر ہیں کیونکہ چار بار چین نے مسعود اظہر کو عالمی دہشت گرد قرار دینے کے خلاف ویٹو کا استعمال کیا تھا۔‘‘

ان کا مزید کہنا تھا کہ ’’چین کی مخالفت کے باوجود اقوام متحدہ نے مسعود اظہر کو عالمی دہشت گرد قرار دیا ہے جس سے بھارت میں خوشی کا ماحول ہے اور جشن منایا جا رہا ہے۔‘‘

انہوں نے وزیر اعظم نریندر مودی کی تعریف کرتے ہوئے کہا کہ ’’اب پاکستان تماشا دیکھے گا۔‘‘

جشن میں شامل افراد نے مسعود اظہر کے خلاف اور نریندر مودی کے حق میں زبردست نعرے بازی کی۔