جموں میں بی ایس ایف نے 135 فٹ اونچے پول پر ترنگا لہرایا

آئی جی بی ایس ایف جموں این ایس جموال کے مطابق پول پر لہرایا جانے والا ترنگا نہ صرف جموں بلکہ پاکستان سے بھی دیکھا جا سکتا ہے۔

بارڈر سکیورٹی فورس (بی ایس ایف) نے 72 ویں یوم جمہوریہ کے موقع پر منگل کو جموں کے مضافاتی علاقہ سچیت گڑھ میں بین الاقوامی سرحد کی اوکٹرائی پوسٹ کے نزدیک 135 فٹ اونچے پول پر ترنگا لہرایا ہے۔

135 فٹ اونچا یہ پول اس جگہ پر نصب کیا گیا ہے جہاں سے بین الاقوامی سرحد کی باڑ محض ایک سو میٹر کی دوری پر واقع ہے۔ آئی جی بی ایس ایف جموں این ایس جموال کے مطابق پول پر لہرایا جانے والا ترنگا نہ صرف جموں بلکہ پاکستان سے بھی نظر آئے گا۔

انہوں نے پرچم کشائی کے بعد نامہ نگاروں کو بتایا 'یہ ایک بہت بڑی کامیابی ہے۔ بہت خوشی کی بات ہے کہ بی ایس ایف نے جس جگہ کو چنا ہے وہ ایک سیاحتی مقام ہے۔ ہم اس کے ذریعے امن کا پیغام دینا چاہتے ہیں۔ میں چاہتا ہوں کہ زیادہ سے زیادہ لوگ یہاں آئیں'۔

ان کا مزید کہنا تھا: 'یہ جھنڈا دور دور سے نظر آئے گا۔ جموں ہی نہیں پاکستان سے بھی دکھائی دے گا۔ یہ امن کی ایک علامت ہے۔ ہم امن کا پیغام دینا چاہتے ہیں'۔