ایل او سی پر فوجی مستعد، ڈرونز کے ذریعے بھی کی جا رہی ہے نگرانی

Indian Army on High Alert along LoC in Jammu: دراندازی، عسکری سرگرمیوں، منشیات کی اسمگلنگ کو روکنے کے لیے سرحد پر بھارتی فوجیوں نے نہ صرف گشت اور سرچ آپریشن میں تیزی لائی ہے بلکہ اب نگرانی کے لیے ڈرونز کا استعمال بھی کیا جا رہا ہے۔

جموں (جموں کشمیر):صوبہ جموں کے سرحدی علاقوں بشمول لائن آف کنٹرول (ایل او سی) اور انٹرنیشنل بارڈر (آئی بی) کے نزدیکی علاقوں سمیت جنگلاتی علاقوں میں بھی فوجیوں سے چوکس رہنے کی تلقین کی گئی ہے۔ پونچھ اور راجوری کے جنگلات میں، عسکریت پسندوں نے گھات لگا کر فوجیوں پر حملے کیے اور بعد ازاں فرار ہونے میں بھی کامیاب ہوئے۔ 2023 میں ان حملوں میں 20 سے زیادہ فوجی جوان مارے گئے۔ جس کے بعد نہ صرف فوج اور بی ایس ایف کے اعلیٰ افسران بلکہ وزیر دفاع نے بھی صوبہ جموں کا دورہ کرکے سیکورٹی صورتحال کا جائزہ لیا۔

21 دسمبر 2023 کو عسکری حملے کے بعد فوجیوں کو الرٹ رہنے کی ہدایت دی گئی ہے اور گشت کرنے والے فوجیوں کی تعداد بھی بڑھا دی گئی ہے۔ فوجیوں کو انتہائی جدید ہتھیاروں اور آلات سے بھی لیس کیا گیا ہے۔ سرحد کی نگرانی کے لیے نہ صرف اسمارٹ فینسنگ، سی سی ٹی وی بلکہ اب ڈرونز کے ذریعے سے بھی نگرانی کی جا رہی ہے۔ فوجی ذرائع کے مطابق ایل او سی کے متصل علاقوں میں مشکوک نقل و حرکت بھی دیکھنے کو مل رہی ہے۔

یاد رہے کہ وزیر دفاع راج ناتھ سنگھ اور آرمی چیف منوج پانڈے نے بھی 27 دسمبر کو راجوری اور پونچھ کا دورہ کیا اور فوجی جوانوں سے ملاقات کی۔ وزیر داخلہ امیت شاہ کا بھی 9 جنوری کو راجوری کا دورہ طے تھا تاہم خراب موسم کی وجہ سے وہ دورہ منسوخ کرنا پڑا۔ ذرائع کے مطابق صوبہ جموں کے جنگلاتی علاقوں میں کئی عسکری گروپ سرگرم ہیں جبکہ سرحد پار سے ان کی اعانت کے لیے ڈرونز کے ذریعے نہ صرف ہتھیار بلکہ منشیات کی کھیپ بھی بھیجی جاتی ہے۔ اس سبھی صورتحال کے پیش نظر سرحد پر فوج نے گشت اور سرچ آپریشن میں اضافہ کیا ہے جبکہ ڈرونز کے ذریعے نگرانی بھی بڑھا دی گئی ہے۔