کورونا وائرس کے باعث سالانہ شری امر ناتھ یاترا شروع ہونے پر ابہام کے بیچ شرائن بورڈ نے جمعہ کے روز جموں میں 'پراتھم پوجا' مذہبی جوش و جذبے کے ساتھ انجام دی۔
پوجا کو شری امرناتھ شرائن بورڈ کے تالاب تلو دفتر میں انجام دیا گیا۔
شرائن بورڈ کے سی ای او بپل پاٹھک نے اس موقعے پر میڈیا کو بتایا کہ اس پوجا کو جیشٹھ پورنیما کے دن حسب معمول یاترا کے دوران چندن واڑی کشمیر میں انجام دیا جاتا تھا لیکن امسال کورونا وائرس کی وجہ سے اس کو یہیں انجام دیا گیا۔
انہوں نے کہا کہ سالانہ یاترا کے لئے تیاریاں کی جا رہی ہیں اور یہ پوجا اسی سلسلے کی ایک کڑی ہے۔
سی ای او نے مزید کہا کہ وزارت امور داخلہ کی طرف سے جاری گائیڈ لائنز کے تحت ملک میں عبادت گاہوں کو آٹھ تاریخ سے کھولا جا رہا ہے۔ انہوں نے کہا کہ تازہ گائیڈ لائنز جاری کی جائیں گی جس سے سالانہ شری امرناتھ یاترا کے شروع ہونے کے لئے راہ ہموار ہوگی۔
یاترا کی مدت کو مختصر کرکے صرف پندرہ دن رکھنے کی رپورٹس کو رد کرتے ہوئے پاٹھک نے کہا: ’’یاترا کے لئے تیاریاں جاری ہیں کورونا کے پیش نظر تمام اقدامات کئے جائیں گے اور اسی کے تحت فیصلے لئے جائیں گے۔‘‘
پراتھم پوجا میں شرائن بورڈ کے چیف ایگزیکٹو افسر بپل پاٹھک، ایڈیشنل سی ای او انوپ کمار سونی، ویشو ہندو پریشد کے ورکنگ صدر راجیش گپتا اور کونسلر سنجے بارو کے علادہ دیگر کئی لوگوں نے شرکت کی۔
دریں اثنا وی ایچ پی کے ورکنگ صدر راجیش گپتا نے کہا کہ ہم امید کرتے ہیں یاتریوں کو بہترین سہولیات فراہم کی جائیں گی۔
