وسیم رضوی نے ’’ایک نیا قرآن ترتیب‘‘ دیکر اس کا ماڈل وزیر اعظم نریندر مودی کو بھیج کر یہ مطالبہ کیا ہے کہ ’’اب اسی ماڈل کو ملک کے تمام مدرسوں اور مسلم معاشرے میں پڑھانے کا حکم دیا جائے۔‘‘
جموں: وسیم رضوی کے خلاف مقدمہ دائر کرنے کی مانگ اترپردیش شیعہ وقف بورڈ کے سابق چیئرمین وسیم رضوی کی جانب سے ’’قرآن پاک کی توہین‘‘ کیے جانے کے خلاف جموں میں انجمن امامیہ نے شدید مذمت کی ہے اور انجمن کے عہدیداران نے وسیم رضوی کے خلاف ایس ایس پی جموں کو یادداشت پیش کرکے اس کے خلاف مقدمہ درج کرنے کا مطالبہ کیا ہے۔
انجمن امامیہ جموں کے صدر نے ای ٹی وی بھارت کو بتایا کہ ’’وسیم رضوی شیعہ سنی بھائی چارے کو بگاڑنا چاہتا ہے۔‘‘
ای ٹی وی بھارت کے ساتھ بات کرتے ہوئے انجمن امامیہ جموں کے نائب صدر نے کہا کہ ’’اس طرح کی حرکت ایک اکیلا انسان قطعا نہیں کر سکتا۔ اس ایجنڈے کے پیچھے کسی نہ کسی حکومت، یا کسی جماعت کا ہاتھ شامل ہے، ورنہ ایک منفرد شخص اس طرح کی گستاخی کرنے کی سوچ بھی نہیں سکتا۔‘‘
انہوں نے کہا کہ قرآن کریم اللہ کا کلام ہے جس میں 6ہزار 6سو 66آیتیں ہیں جو قیامت تک باقی رہیں گی، جنہیں کوئی بھی طاقت تبدیل نہیں کر سکتی۔
انجمن امامیہ جموں کی جانب سے بلائے گئے اجلاس میں مختلف طبقہ ہائے فکر سے وابستہ رہنمائوں اور لیڈران نے شرکت کی اور وسیم رضوی کے خلاف کارروائی کیے جانے کا مطالبہ کیا۔
قابل ذکر ہے کہ وسیم رضوی نے قرآن پاک سے 26آیات کو نکالے جانے سے متعلق سپریم کورٹ میں عرضی دائر کی تھی جسے عدالت عظمیٰ نے خارج کرتے ہوئے وسیم رضوی پر 50ہزار روپے کا جرمانہ بھی عائد کیا تھا۔
تاہم حالیہ دنوں وسیم رضوی نے از خود ’’ایک نیا قرآن ترتیب‘‘ دیکر اس میں سے 26آیات کو نکال کر نہ صرف وزیر اعظم کو ارسال کیا بلکہ اسے سماجی رابطہ گاہ پر بھی شیئر کیا۔
وسیم رضوی کے خلاف جموں و کشمیر سمیت ملک بھر میں احتجاج کرکے اسکے خلاف کارروائی کیے جانے کا مطالبہ کیا جا رہا ہے۔
