لشکر مصطفیٰ کے سربراہ کی گرفتاری کے بعد اس کی اہلیہ سمیت دو افراد گرفتار

پولیس کے مطابق 'دونوں مالکان نے کرایہ داروں سے متعلق نہ ہی پولیس کو اطلاع دی تھی اور نہ ہی پولیس اسٹیشن سے کوئی تصدیق کی تھی۔ لہذا، مالکان نے ضلعی مجسٹریٹ جموں کے نوٹیفکیشن کی خلاف ورزی کی ہے جس میں متعلقہ پولیس اسٹیشن کو کرایہ دار کے بارے میں آگاہ کرنا لازمی تھا۔'

جموں سے ایک عسکریت پسند کمانڈر کی گرفتاری کے ایک دن بعد پولیس نے آج جموں ڈسٹرکٹ کے پولیس تھانہ بہو فورٹ کے سنجوان کے علاقے میں کرایہ داروں کی شناخت چھپانے کے جرم میں دو مکان مالکان اور لشکرِ مصطفیٰ نامی عسکری تنظیم کے سربراہ ہدایت اللہ ملک کی اہلیہ کو گرفتار کیا ہے، جس کی شناخت سیبا کے طور ہوئی ہے، جو کشمیر یونیورسٹی میں ایل ایل ایم کی طالبہ ہے۔ سیبا کو استاد محلہ میں موجود ان کی بہن کے گھر سے گرفتار کیا گیا۔

پولیس کے مطابق غیر تصدیق شدہ کرایہ داروں میں لشکرِ مصطفیٰ کے چیف ہدایت اللہ ملک ولد عبد الحمید ملک ساکن ہرد پورہ شوپیان شامل تھا۔

پولیس نے بتایا کہ ملک کو گذشتہ روز پولیس ٹیم نے گنگیال کے علاقے کنجوان سے گرفتار کیا تھا اور اس پر 2021 کی ایف آئی آر نمبر 16 کے تحت دفعہ 18/20 غیر قانونی سرگرمیوں کے تحت گنگیال پولیس اسٹیشن میں مقدمہ درج کیا گیا ہے۔

پولیس نے بتایا کہ ایس ایچ او بہو فورٹ، پولیس اسٹیشن باہو فورٹ انسپکٹر دیپک پٹھانیا کی سربراہی میں ایک ٹیم نے کرایہ دار ہدایت اللہ ملک ولد عبد الحمید ملک ساکن ہرد پورہ، شوپیان کی ویریفیکیشن کی جس پر غیر قانونی ایکٹ کے تحت مقدمہ درج تھا۔ اس کے علاوہ نذیر احمد ولد محمد رمضان ساکنہ شوپیاں کی بھی ویریفیکیشن کی گئی۔

یہ لوگ سنجیوان کے رہائشی نذیر احمد ولد لسا بھٹ اور مومن آباد سنجوان کے رہائشی فاروق احمد ولد سراج دین کے گھروں میں مقیم تھے۔

پولیس کے مطابق 'دونوں مالکان نے اس سے متعلق نہ ہی پولیس کو اطلاع دی تھی اور نہ ہی پولیس اسٹیشن سے کوئی تصدیق کی تھی۔ لہذا، مالکان نے ضلعی مجسٹریٹ جموں کے نوٹیفکیشن کی خلاف ورزی کی ہے جس میں متعلقہ پولیس اسٹیشن کو کرایہ دار کے بارے میں آگاہ کرنا لازمی تھا۔'

دریں اثناء آئی پی سی کی دفعہ 188 کے تحت 2021 کے ایف آئی آر نمبر 41 اور آئی پی سی کی دفعہ 188 کے تحت 2021 کی ایف آئی آر نمبر 42 میں دونوں مکان مالکان کے خلاف تھانہ بہو فورٹ میں مقدمہ درج کیا گیا ہے۔

دریں اثنا پولیس کی خصوصی تفتیشی ٹیم نے رات گئے چھاپہ مار کارروائی کرتے ہوئے جموں کے اولڈ سٹی ایریا کے استاد محلہ سے گنو پورہ شوپیان کی رہائشی ایک خاتون کو حراست میں لیا ہے۔

پولیس کے مطابق 'جب مبینہ طور پر عسکریت پسند کمانڈر کو کنجوانی سے گرفتار کیا گیا تھا تو وہ مبینہ طور پر موقع سے فرار ہوگئی تھی۔' گرفتار شدہ خاتون کی شناخت ہدایت اللہ کی اہلیہ کے طور کی گئی ہے۔

انہوں نے کہا اس سلسلہ میں مزید تفتیش جاری ہے۔

واضح رہے حکومت نے حال ہی میں کہا تھا کہ سیکیورٹی ایجنسیوں کی کوشش رہتی ہے کہ وہ عسکریت پسندوں کو زندہ گرفتار کریں۔