سڑک کی خستہ حالی سے عوام پریشان

جموں و کشمیر کے ضلع اننت ناگ کے شانگس علاقہ کے لوگ سڑک کی خستہ حالی سے پریشان ہیں اور راہگیروں کو آنے جانے میں سخت مشکلات کا سامنا کرنا پڑ رہا ہے۔

علاقہ کی رابطہ سڑک پر جگہ جگہ گہرے گھڑے بن گئے ہیں۔ مقامی لوگوں کا کہنا ہے کہ معمولی بارش کے ہوتے ہی سڑک پر کافی پانی جمع ہو جاتا ہے جو مکانوں اور دکانوں کے اندر داخل ہو جاتا ہے۔

وہیں کیچڑ اور گندہ پانی جمع ہونے کے سبب عام لوگوں خاص کر بچوں، بیماروں اور بزرگوں کو چلنے پھرنے میں کافی دقت ہو رہی ہے۔

لوگوں نے شکایت کرتے ہوئے کہا کہ انہوں نے کئی مرتبہ سڑک کا معاملہ متعلقہ محکمہ کی نوٹس میں لایا تاہم اس مسئلے کی جانب کوئی بھی غور و فکر نہیں کیا گیا۔

انہوں نے انتظامیہ سے سڑک کی مرمت کو یقینی بنانے کا مطالبہ کیا تاکہ انہیں مزید مشکلات سے دوچار نہ ہونا پڑے۔