Water Logging ترال میں بارش کے سبب سڑکیں اورمکانات زیر آب، عوام پریشان

ضلع پلوامہ کے سب ضلع ترال کے املر گاؤں میں موسلا دھار بارش کے سبب رہائشی علاقوں میں پانی جما ہونے سے عام لوگوں کی پریشانیوں میں اضافہ ہوا ہے۔بارش کا پانی گھروں میں داخل ہوگیا ہے سڑکیں ڈوب گئیں ہیں۔ مقامی باشندوں نے ضلع انتظامیہ پر عدم توجہی کا الزام لگایا۔

ترال:مرکز کے زیر انتظام جموں و کشمیر کے سب ضلع ترال (پلوامہ) میں گزشتہ چند دنوں سے بارش کا سلسلہ جا ری ہے جس سے عام زندگی مفلوج ہو کر رہ گئی ہے۔ کھانڈے محلہ املر ترال میں بارشوں کا پانی گھروں میں داخل ہوا جسکی وجہ سے لوگ زبردست پریشان ہوگئے ہیں۔

مقامی باشندوں نے بتایا کہ دراصل یہاں ایک آبپاشی کوہل پر بعض حریص عناصر نے قبضہ جما دیا ہے اور چودہ فٹ نہر سمٹ کر محض تین فٹ رہ گئی ہے جسکی وجہ سے پانی کی نکاسی نہیں ہو رہی ہے اور یہ پانی گھروں میں داخل ہو جاتا ہے جسکی وجہ سے لوگوں کو عبور ومرور میں دقتوں کا سامنا کرنا پڑ رہا ہے جبکہ لوگ گھروں کے اندر ہی محصور ہو کر رہ گے۔

میڈیا کے ساتھ بات کرتے ہوئے مقامی باشندوں نے الزام عاید کیا کہ انتظامیہ کو بار بار مطلع کرنے کے باوجود انہوں نے کوئی قدم نہیں اٹھایا جس سے ہماری پریشانیوں میں مزید اضافہ ہوا ہے۔انتظامیہ کی عدم توجہی کے سبب محلے کا برا حال ہو گیا ہے۔

انہوں نے کہاکہ انتظامیہ کو نکاسی نظام کو بہتر بنانے کی کوشش کرنی چاہئے تاکہ برسات کی وجہ سے ہمیں ہونے والی پریشانیوں سے نجات مل سکے ۔مقامی لوگوں نے ضلع ترقیاتی کمشنر پلوامہ سے اس ضمن میں ذاتی مداخلت کی اپیل کی ہے۔

واضح رہے کہ وادی کشمیر میں مُسلسل بارش سے جہاں عام زندگی متاثر ہوئی ہے وہیں نکاسی نظام نہ ہونے سے سڑکیں زیر آب آگئی ہیں جبکہ کھڑی فصلوں کو بھی بڑے پیمانے پر نقصان پہنچا ہے اس دوران ڈوٰیژنل انتظامیہ نے کنٹرول روم قایم کیے ہیں