پلوامہ میں کشیدگی برقرار

ریاست جموں کشمیر کے جنوبی ضلع پلوامہ میں گزشتہ روز نا معلوم بندوق برداروں نے سرگرم عسکریت پسند کے بھائی کو گولی مار کر ہلاک کر دیا تھا۔

ضلع کے نائرہ علاقے سے تعلق رکھنے والے ظہور احمد نامی ایک شخص کو گزشتہ روز نا معلوم افراد نے گولی مار کر ہلاک کر دیا تھا۔

جمعرات صبح ظہور کی گولیوں سے چھلنی لاش برآمد ہونے کے بعد مقامی لوگوں نے زبردست احتجاج کرکے لاش کو پولیس اسٹیشن لے جانے کی کوشش کی تاہم پولیس نے آنسو گیس کے گول داغے اور بھیڑ کو منتشر کر دیا۔

بعد ازاں ظہور احمد کو سپرد خاک کیا گیا۔

ظہور کی ہلاکت کے بعد علاقے میں غم و غصہ پایا جا رہا ہے۔

علاقے میں آج صبح سے ہی کشیدگی اور غیر یقینیت کا ماحول تھا، جس وجہ سے انتظامیہ نے جگہ جگہ حفاظتی اہلکاروں کی بھاری نفری کو تعینات کیا تھا۔ تاہم ضلع سے کسی بھی نا خوشگوار واقعے کی کوئی اطلاع نہیں ہے۔

قابل ذکر ہے کہ مقتول حزب المجاہدین کے سرگرم عسکریت پسند عرفان احمد کا بھائی تھا۔