سرحد پار سے آئیں دو لڑکیاں گرفتار: فوج کا دعویٰ

پاکستان کے زیرانتظام کشمیر سے دو لڑکیاں سرحد پار کر کے پونچھ سیکٹر میں داخل ہوئیں۔

جموں میں تعینات دفاعی ترجمان کا کہنا ہے کہ لائن آف کنٹرول کے پونچھ سیکٹر میں نادانستہ طور پر بھارتی حدود میں داخل ہونے والی پاکستان زیر قبضہ کشمیر کی دو کمسن لڑکیوں کی فوری گھر واپسی یقینی بنانے کی کوششیں کی جا رہی ہیں۔

انہوں نے اپنے ایک بیان میں کہا: 'پاکستان زیر قبضہ کشمیر کی دو لڑکیاں لیبہ زبیر، عمر 17 اور ثنا زبیر، عمر 13 ساکنان عباس پور تحصیل کہوٹہ اتوار کی صبح نادانستہ طور پر پونچھ سیکٹر کے راستے بھارتی حدود میں داخل ہوئیں'۔

ان کا مزید کہنا تھا: 'ایل او سی پر تعینات ہمارے فوجیوں نے ان لڑکیوں کو سرحد عبور کرتے ہوئے دیکھا اور ان کو کسی بھی نقصان سے بچانے کے لئے حد درجہ احتیاط سے کام لیا۔ ان لڑکیوں کی فوری گھر واپسی یقینی بنانے کی کوششیں کی جا رہی ہیں'۔

ذرائع نے بتایا کہ فوج نے دونوں لڑکیوں کو حراست میں لینے کے بعد پولیس کے سپرد کیا۔ انہوں نے مزید کہا کہ دونوں کی فوری واپسی یقینی بنانے کی کوششیں جاری ہیں۔