کرشنا ڈھابہ حملے میں ملوث تینوں عسکریت پسند گرفتار: پولیس

بدھ کی شام ڈل گیٹ سرینگر میں کرشنا ڈھابہ کے مالک کے بیٹے پر گولیاں چلانے والے تینوں عسکریت پسندوں کو پولیس نے گرفتار کرلیا ہے۔

جموں و کشمیر کے دارالحکومت سرینگر میں پریس کانفرس سے خطاب کرتے ہوئے کشمیر زون کے انسپکٹر جنرل آف پولیس وجے کمار نے حملہ آوروں کے منصوبے کی تفصیل دیتے ہوئے کہا کہ تینوں عسکریت پسند موٹر سائیکل پر آئے تھے جن میں سے دو نے دکان کے اندر داخل ہو کر ڈھابہ مالک پر گولیاں چلائیں۔

انہوں نے کہا کہ حملہ آوروں میں سے دو کا تعلق پلوامہ ضلع کے پامپور سے ہے جبکہ تیسرا پلوامہ کا رہنے والا ہے۔

قابل ذکر ہے کہ بدھ کو مشہور کرشنا ڈھابہ مالک کے بیٹے آکاش مہرا ولد رمیش مہرا پر نامعلوم افراد نے گولیاں چلا کر انہیں شدید طور پر زخمی کر دیا۔ انہیں زخمی حالت میں فوری طور پر ایس ایم ایچ ایس ہسپتال منتقل کیا گیا تھا جہاں علاج کے بعد ان کی حالت بہتر ہورہی ہے۔

اس حملے سے متعلق سوشل میڈیا پر مسلم جانباز فورس جموں و کشمیر نامی عسکریت پسند تنظیم کی جانب سے اردو میں لکھا ہوا ایک بیان وائر ہورہا ہے جس میں سرینگر میں کرشنا ڈھابے کے مالک پر حملے کی زمہ داری قبول کی گئی ہے۔

وہیں اس میں یہ بھی لکھا گیا ہے کہ غیر ریاستی ڈومیسائل حاصل کرنے والوں کا یہی انجام ہوگا۔

وجے کمار کا کہنا تھا کہ اس حملے کے پیچھے ٹی آر ایف عسکریت پسند تننطیم کے کمانڈر غازی کی ہدایت تھی جموں میں اس سے فرقہ وارانہ فسادات کو ہوا دینے کی کوشش تھی۔

انہوں نے کہا کہ دراصل راکیش مہرا جموں کے نگروٹہ علاقے سے ہیں اور گزشتہ کئی دہائیوں سے سرینگر میں ڈھابہ چلا رہے ہیں۔

راوے پورہ تصادم میں ہلاک ہوئے نوجوان اطہر مشتاق کے والد اور دیگر رشتہ داروں پر ملک مخالف سرگرمیوں پر مبنی مقدمہ درج کرنے کی تصدیق کرتے ہوئے وجے کمار نے کہا کہ جو بھی شخص ملک کے مخالف سرگرمیوں میں پایا جائے گا، اس کے خلاف یو اے پی اے کے تحت مقدمہ درج کیا جائے گا۔

انہوں نے کہا کہ نیشنل کانفرس کے لیڈر اکبر لون پر بھی یہی مقدمہ درج کیا گیا ہے۔