کولگام میں پولیس اہلکار کی پٹائی

جنوبی کشمیر کے ضلع کولگام کے ٹنگبل علاقے میں دوران شب اُس وقت حالات کشیدہ ہوگئے جب علاقے میں نامعلوم بندوق برداروں کا گروپ نمودار ہوا۔

اطلاعات کے مطابق ٹنگبل علاقے میں میڈکل شاپ پر اچانک اسلحہ بردار کئی افراد نکل آئے اور وہاں پر میڈیکل اسٹور میں پولیس اہلکار کی مُبینہ طور پٹائی کی اور انہیں پولیس کی نوکری چھوڑنے کے لیے بھی کہا ہے۔

ذرائع کے مطابق عادل بشیر ولد بشیر احمد ڈار نامی ایک پولیس اہلکار جو پولیس میں ایس پی او کے طور پر کام کر رہا ہے، کی نامعلوم بندوق برداروں نے پٹائی کی اور انہیں خبردار کیا کہ وہ ایس پی او کی نوکری کو چھوڑ دے۔

اس دوران راتوں رات سکیورٹی فورسز نے بڑے پیمانے پر علاقے کو اپنی تحویل میں لیا اور تلاشی کارروائی شروع کردی۔

ایک پولیس آفیسر نے اس معاملے کی تصدیق کرتے ہوئے کہا کہ ایس پی او پولیس لائنز میں روزانہ کی بنیاد پر اپنے فرائض انجام دے رہا تھا لیکن کچھ دنوں پہلے ہی وہ چھٹی پراپنے گھر گیا تھا۔

انہوں نے معاملے کی تصدیق کرتے ہوئے کہا کہ مسلحہ افراد کی بڑے پیمانے پر تلاشی کاروائی شروع کر دی ہے۔