سہ پہر بعد موسم میں نمایاں تبدیلی

محکمہ موسمیات نے وادی کشمیر میں موسمی صورتحال کے حوالے سے الرٹ جاری کیا ہے جس میں پیشن گوئی کی گئی ہے کہ رواں ماہ کی 13 تاریخ تک وادی کشمیر میں تیز ہواؤں کے ساتھ بارشوں کا سلسلہ وقفے وقفے سے جاری رہنے کے امکانات ہیں ۔

محکمہ موسمیات کی جانب سے جاری کئے گئے بلیٹن میں بتایا گیا ہے کہ 10جون سے لے کر 13 جون تک تیز ہواؤں کے ساتھ ساتھ بارشیں ہونے کا بھی امکان ہے۔

محکمہ کے ڈپٹی ڈائریکٹر ڈاکٹر مختار احمد نے ای ٹی وی بھارت کو فون پر بتایا کہ وادی کشمیر کے اکثر مقامات پر آئندہ دنوں میں تیز ہواؤں کے علاوہ گرج چمک کے ساتھ بارشیں ہوسکتی ہیں ۔

انہوں نے کہا کہ اس عرصے کے دوران وادی کشمیر میں 40کلومیڑ فی گھنٹہ کی رفتار سے تیز ہوائیں بھی چلیں گی۔البتہ یہ سلسلہ چند ایک مقامات پر ہی وقفے وقفے سے جاری رہے گا۔

ادھر وادی کے جنوب وشمال میں گزشتہ کئی روز سے سہ پہر کے بعد موسم میں اچانک تبدیلی دیکھنے کو ملتی ہے۔

آسمان آبر الود ہونے کے ساتھ ہی تیز ہواؤں اور بارشوں کا سلسلہ چند گھنٹوں تک جار رہتا ہے ۔

واضح رہے گزشتہ دنوں سے کئ مقامات پر قہر انگیز ژالہ باری بھی ہوئی ہے۔جس کے نتیجے میں باغات ،میوہ جات اور کھڑی فصلوں کے ساتھ ساتھ سبزیوں کو بھی شدید نقصان پہنچا ہے۔

وہیں اس صورتحال کے باعث وادی کے کسان مزید پریشانی میں مبتلا ہوگئے ہیں ۔