بارش اور ژالہ باری سے میوہ باغات کو شدید نقصان

شمالی کشمیر کے مختلف اضلاع میں گزشتہ روز شدید بارش اور ژالہ باری سے میوہ باغات کو شدید نقصان پہنچا ہے۔ جس کے بعد کسانوں نے حکومت سے مالی مدد کا مطالبہ کیا ہے۔

جموں و کشمیر کے بارہمولہ میں ان دنوں موسم کا مزاج بدلہ ہوا ہے۔ شمالی کشمیر کے مختلف اضلاع میں گزشتہ روز شدید بارش اور ژالہ باری سے باغ بانی شعبہ سے منسلک افراد کو کافی نقصان سے دوچار ہونا پڑا ہے۔

اس تعلق سے ایک کسان نے بتایا کہ اتوار کے روز دوپہر میں رفیع آباد کے ملحقہ علاقوں میں قریب 10منٹ تک شدید ژالہ باری کے ساتھ ساتھ بارش ہوئی جس کی وجہ سے کھڑی فصلوں کے ساتھ ساتھ میوہ کے درختوں کو کافی نقصان پہنچا ہے۔ اس سلسلے میں کسانوں نے حکومت سے مطالبہ کیا ہے کہ ژالہ باری سے میوہ باغات کو شدید نقصان پہنچا ہے جس سے ان کے روزگار پر منفی اثرات مرتب ہو رہے ہیں، اس لیے ہمیں مالی معاونت فراہم کی جائے۔