Boy Dies In Leopard Attack بانڈی پورہ کے نسبل علاقے میں تیندوے کے حملے میں 7 سالہ بچہ لقمہ اجل

شمالی کشمیر کے ضلع بانڈی پورہ کے نسبل علاقے میں پیر کی شام سے لاپتہ 7 سالہ بچے کی مسخ شدہ لاش منگل کی صبح نزدیکی جنگل میں پائی گئی۔ جس کے بارے میں خیال کیا جارہا ہے کہ علاقے میں اکثر نمودار ہونے والے تیندوے نے اس کو اپنا نوالہ بنا یا ہے۔

بانڈی پورہ: مرکز کے زیر انتظام جموں و کشمیر کے بانڈی پورہ کے نسبل علاقے میں پیر کی شام ایک بچہ لاپتہ ہوا اور تلاش کے دوران اہل خانہ نے ایک کھیت میں خون کے دھبے اور اس کے کپڑے دیکھے۔ جس کے بعد انہوں نے پولیس کو اطلاع دی۔ انہوں نے کہا کہ بعد ازاں پولیس، فوج کی 13 آر آر اور سی آر پی ایف کی ایک مشترکہ ٹیم نے بچے کی وسیع پیمانے پر تلاش شروع کر دی۔

ان کا کہنا تھا کہ بالآخر منگل کی صبح بچے کی مسخ شدہ لاش نسبل میں ہی جنگل کے نزدیک علاقے میں پائی گئی۔پولیس نے لاش کو اپنی تحویل میں لے کر پوسٹ مارٹم کے لئے سمبل ہسپتال منتقل کیا جس کے بعد اس کو لواحقین کے سپرد کیا گیا۔ مقامی سرپنچ نے میڈیا کو بتایا کہ بار ہا میں نے متعلقہ حکام کو ریچھ کے گھومنے کے بارے میں مطلع کیا لیکن کوئی ٹس سے مس نہیں ہو رہا ہے۔

انہوں نے کہا کہ یہ ریچھ مہینے میں دس پندرہ شکار کرتا ہے۔ ان کا کہنا تھاکہ 'نسبل کا یہ جنگل گاندربل کے ساتھ آتا ہے۔ ہماری خواتین باہر نہیں نکل سکتی ہیں۔ ہمارے بچے کھیل نہیں پا رہے ہیں یہ وائلڈ لائف محکمے کی ناکامی ہے۔ ایک اور بزرگ نے میڈیا کو بتایا کہ یہ بچہ نماز مغرب کے بعد لاپتہ ہوگیا۔