واضح رہے کہ جموں و کشمیر کی خصوصی آئینی حیثیت دفعہ 370 کی منسوخی کے بعد یہ مرکزی وزراء کا دوسرا دورہ ہوگا۔
توقع کی جارہی ہے کہ وزراء کے پہلے وفد کے دورے کے بعد پیش آنے والی پیشرفتوں کا جائزہ لینے کے لیے تقریبا 40 وزراء جموں و کشمیر کا دورہ کریں گے۔
سرکاری ذرائع کے مطابق اس دورے کی تاریخوں کا اعلان نہیں کیا گیا ہے لیکن یہ توقع کی جارہی ہے کہ آئندہ پارلیمنٹ کا اجلاس ختم ہونے کے بعد وزراء جموں و کشمیر کا دورہ کریں گے۔
سرکاری عہدیدار کے مطابق پی ایم او آفس وزراء کی فہرست کو حتمی شکل دے گا اور ہر وزیر کو ایک خاص ضلع سونپا جائے گا۔
عہدیدار نے بتایا کہ وزراء مرکزی حکومت اور مقامی انتظامیہ کی جانب سے شروع کردہ ترقیاتی کاموں کا جائزہ لیں گے اور وہ سیاسی امور کے بارے میں بات نہیں کریں گے۔
انہوں نے کہا کہ یہ وفد ترقی کے علاوہ بجٹ کے بعد منصوبے پر عمل درآمد کی شرح پر بھی غور کریں گے۔ وزیر خزانہ نرملا سیتارامن نے بجٹ میں جموں و کشمیر کے لئے 30ہزار 757 کروڑ روپئے کا اعلان کیا تھا۔
