سچن پائلٹ کو عمر عبداللہ سے ملنے نہیں دیا گیا

سچن پائلٹ ان دنوں اپنے سسرال میں ہیں اور حکومت سے اجازت کی درخواست کے بعد بھی انہیں سابق وزیر اعلیٰ عمر عبداللہ سے ملنے نہیں دیا گیا ہے۔

راجستھان کے نائب وزیر اعلیٰ سچن پائلٹ ان دنوں مرکز کے زیر انتظام جموں و کشمیر کے دورے پر ہیں، کشمیر پہنچ کر جب انہوں نے اپنے برادر نسبتی اور سابق وزیر اعلیٰ عمر عبداللہ سے ملنا چاہا تو انہیں ملنے نہیں دیا گیا۔

سچن پائلٹ نے گلمرگ سے ای ٹی وی بھارت کےنمائندے سے بات چیت کرتے ہوئے کہا کہ انہوں نے عمر عبداللہ سے ملنے کے لیے جموں و کشمیر انتظامیہ سے اجازت مانگی ہے تاہم ابھی تک انتظامیہ نے انہیں کوئی جواب نہیں دیا ہے۔

ادھر انتظامیہ کے ذمہ دار افسر نے بتایا 'عمر عبداللہ کے ساتھ ملاقات کیلئے سچن پائیلٹ نے رجوع کیا تھا لیکن انہیں ملاقات کی اجازت نہیں دی جائے گی اور انتظامیہ سچن پائیلٹ کو کل دلی روانہ ہونے کیلئے کہے گی'۔

عمر عبداللہ کی سب سے چھوٹی بہن سارہ عبداللہ کی شادی سچن پائیلٹ کے ساتھ ہوئی ہے۔ وہ دونوں ایک ہی کالج میں پڑھتے تھے۔

جموں و کشمیر کی خصوصی آئینی حیثیت کے خاتمے اور ریاستی درجے کے مرکزی زیر انتظام علاقے میں تنزل کے مرکزی حکومت کے فیصلے کے بعد گزشتہ برس 4 اگست سے عمر عبداللہ نظر بند ہیں۔

حال ہی میں عمر عبداللہ کی ایک تصویر انٹرنیٹ پر خوب وائرل ہوئی، اس تصویر میں وہ چہرے پر لمبی داڑھی کے ساتھ مسکراتے ہوئے نظر آرہے ہیں۔

تصویر کے وائرل ہونے کے بعد بڑے پیمانے پر لوگوں نے مرکزی حکومت کی تنقید کی اور شہری آزادی پر عائد کی گئی قدغنوں کو ہدف تنقید بنایا۔

جموں و کشمیر میں گزشتہ چھ ماہ کے دوران سینکڑوں افراد کو جیلوں اور تھانوں میں بند کردیا گیا ہے۔ ان میں تین سابق وزرائے اعلیٰ سمیت درجنوں ہند نواز لیڈر اور کارکن شامل ہیں جبکہ حکام نے علیحدگی پسند جماعتوں کے سینکڑوں لیڈروں اور کارکنوں کو بھی زیر حراست رکھا ہے۔ ان میں سے بیشتر کو جموں و کشمیر سے باہر کی جیلوں میں منتقل کیا گیا ہے۔