سوپور: زمین سے قدرتی گیس نکلنے کی افواہیں سوشل میڈیا پر وائرل

جموں و کشمیر انتظامیہ کی جانب سے سوپور کے راجپورہ علاقے میں ایک تحقیقاتی عملہ کو روانہ کر دیا گیا ہے اور اس معاملے کی پوری تحقیقات کی جا رہی ہے۔

شمالی کشمیر کے ضلع بارہمولہ کے تحصیل ہیڈ کوارٹر سوپور سے 30 کلو میٹر دور راجپورہ نامی علاقے میں مقامی لوگوں نے پیر کی دوپہر اس علاقے سے قدرتی گیس کا رساو دیکھا جس کے بعد انتظامیہ نے اس معاملے کی پوری تحقیقات کے لئے ایک عملہ کو جائے موقع پر روانہ کیا ہے۔

ذرائع کے مطابق علاقے سے قدرتی گیس نکلنے کی خبریں سوشل میڈیا پر کافی زیادہ پھیلنے کے ساتھ ہی علاقے میں خوف و ہراس کا ماحول پھیل گیا۔

جموں و کشمیر انتظامیہ نے کہا کہ 'ہم اس معاملے کی جانچ کررہے ہیں لیکن ابھی تک اس معاملے کی پوری تصدیق نہیں ہوئی ہے۔'

اس حوالے سے انتظامیہ نے میڈیا کو بتایا کہ اس معاملے کی تحقیقات کے لیے ایک ٹیم علاقے میں بھیجی گئی ہے جو ابھی معائنہ کر رہی ہے اور اس کے بعد ہی ہم کسی نتیجے پر پہنچیں گے اور لوگوں کو اس حوالے سے پوری جانکاری فراہم کی جائے گی۔