پیپلز کانفرنس کا 'ریچ آؤٹ سلام و کلام' پروگرام

ریاست جموں و کشمیر کے ضلع کپواڑہ میں پیپلز کانفرنس کے سربراہ سجاد غنی لون دو روزہ دورے پر ہیں، اس دوران انہوں نے لوگوں کے مسائل و مشکلات کے بارے میں جانکاری حاصل کی۔

تفصیلات کے مطابق پیپلز کانفرنس کے چیئرمین اور کابینہ کے سابق وزیر سجاد غنی لون نے حال ہی میں ' ریچ آؤٹ سلام و کلام' پروگرام کا آغاز کیا۔

انہوں نے اس پروگرام کی شروعات رفیع آباد سے کی اور اس کے بعد اس پروگرام کے تحت اپنے حلقہ انتخاب ہندوارہ کے راجوار علاقے کا دو روزہ دورہ کیا اور لوگوں سے مختلف مسائل پر بات چیت کی۔

قابل ذکر ہے کہ حالیہ پارلیمانی انتخابات میں پیپلز کانفرنس اپنی جیت درج کرنے میں ناکام ہوئی تھی اور لوگوں کا جو اعتماد پیپلز کانفرنس پر تھا وہ نظر نہیں آیا۔

لوگوں میں اعتماد پیدا کرنے کے لیے پیپلز کانفرنس پارٹی نے ریچ آؤٹ پروگرام کے تحت لوگوں سے ملاقات کی اور ان سے ایک بار پھر پارٹی کو مضبوط بنانے کی اپیل کی۔

انہوں نے کہا کہ 'ہندوارہ میں جتنے بھی پروجیکٹز پر سست رفتاری سے کام ہو رہا ہے یا جو پروجیکٹز التواء میں ہے، گورنر انتظامیہ سے ان پروجیکٹز کو مکمل کرنے کا مطالبہ کیا جائے گا۔'

اس موقع پر سجاد غنی لون کے ہمراہ سابق رکن اسمبلی کپواڑہ بشیر احمد ڈار، پیپلز کانفرنس کے رہنما عاشق حسین، لور راجوار کے بلاک صدر عبدالمجید وانی کے علاوہ دیگر کارکنان موجود تھے۔