پانچ ماہ سے سرکاری وظیفہ سے محروم

ساوتھ کشمیر ہینڈی کیپڈ ایسوسی ایشن اننت ناگ کی جانب سے ڈاک بنگلو کھنہ بل میں ایک پریس کانفرنس کا انعقاد کیا گیا۔

پریس کانفرنس کے دوران کشمیر ہینڈی کیپڈ ایسوسی ایشن اننت ناگ کے جنرل سکریٹری اویس احمد نے کہا کہ وہ گزشتہ پانچ ماہ سے سرکاری وظیفہ سے محروم ہیں، جس کی وجہ سے وہ مالی مشکلات کا سامنا کر رہے ہیں۔

انہوں نے کہا کہ وہ ہر ماہ محکمہ سماجی بہبود اننت ناگ کے دفتر کا چکر کاٹ رہے ہیں تاہم انہیں وظیفہ نہ ملنے کی وجہ انٹرنیٹ کی عدم دستیابی بتایا جا رہا ہے نتیجتاً ہر بار انہیں مایوس ہو کر واپس لوٹنا پڑتا ہے۔

انہوں نے حکومت سے متعلقہ محکمہ کے دفتر کو انٹرنیٹ خدمات بحال کرنے کا مطالبہ کیا اور ساتھ میں یہ بھی مطالبہ کیا کہ ان کے ماہانہ وظیفہ کو ایک ہزار سے بڑھا کر تین ہزار کیا جائے تاکہ انہیں مزید مشکلات کا سامنا نہ کرنا پڑے۔