اداکارہ عالیہ بھٹ کی والدہ کے خلاف احتجاجی ریلی

مرکز کے زیر انتظام جموں کے رانی پارک علاقے میں آج سخت گیر موقف رکھنے والے ڈوگرہ فرنٹ کے کارکنان نے پارٹی صدر اشوک گپتا کی صدارت میں اداکارہ عالیہ بھٹ کی والدہ سونی رازدان کے خلاف ایک احتجاجی ریلی نکالی۔

ریلی میں متعدد پارٹی کے کارکنان نے شرکت کی۔ ڈوگرہ فرنٹ کے کارکنان نے سونی رازدان اور افضل گرو کے خلاف نعرے بازی کی اور ان کا پتلہ نذر آتش کیا اور سونی رازدان کو گرفتار کرنے کا مطالبہ کیا۔

بتا دیں کہ اداکارہ عالیہ بھٹ کی والدہ سونی رازدان نے ٹویٹ میں کہا :'یہ انصاف کا مذاق ہے۔ اگر وہ (افضل گرو) بے قصور تھا تو انہیں اب کون واپس لائے گا؟ اس لیے سزائے موت کو ہلکے میں نہیں لیا جانا چاہیے اور اس بات کی بھی ٹھوس جانچ ہونی چاہئے کہ افضل گرو کو قربانی کا بکرا کیوں بنایا گیا؟'۔

سونی رازدان کا یہ ٹوئٹ جموں و کشمیر کے ڈپٹی سپرنٹنڈنٹ پولیس دیویندر سنگھ کی گیارہ جنوری کو ہوئی گرفتاری کے حوالے سے آیا ہے۔ دیویندر سنگھ کو مبینہ طور پر دو کشمیری عسکریت پسندوں کے ساتھ ایک کار پر سفر کرنے کے الزام میں گرفتار کیا گیا تھا۔