گنڈکمال میں بجلی کا نظام خستہ

بجلی کی ترسیلی لائنیں عوام کے لیے خطرے کی گھنٹی بن گئی ہیں جس کے سبب اس مسئلے پر گورنر انتظامیہ سے مداخلت کی اپیل کی گئی ہے۔

جموں و کشمیر کے ضلع کپواڑہ کے گنڈکمال علاقے کے ایس ٹی حلقے میں بجلی نظام خستہ حال ہے۔ بجلی کے کھمبے نہ ہونے کی وجہ سے بجلی کی ترسیلی لائنیں رہائشی مکانوں اور درختوں سے لٹکی ہوئی ہیں جس سے عوام کو ہمیشہ خطرہ لاحق رہتا ہے اور معمولی ہوائیں، بارشوں اور برفباری کی وجہ سے ہفتوں تک بجلی غائب رہتی ہے۔

لوگوں کا کہنا ہے کہ بجلی نظام کی اس خستہ حالت سے اب یہ لوگ کافی پریشان ہیں جس کی وجہ سے ان کے زیر تعلیم بچوں پر بھی اثر پڑ رہا ہے۔

انہوں نے کہا کہ مذکورہ حلقہ ایس ٹی حلقہ ہے اور انہیں ایک سال قبل 108 کے حساب سے بل ادا کرنا پڑتا تھا۔ تاہم گزشتہ ایک سال سے انہیں 374 روپے کے حساب سے بجلی فیس ادا کرنی پڑتی ہے جبکہ یہ لوگ صرف چھ مہینوں میں یہاں ہوتے ہیں اور باقی چھ ماہ بیکھ یعنی مال مویویشوں کے ساتھ جنگلوں میں ہوتے ہیں۔

ان کا کہنا ہے کہ اگر مذکورہ حلقہ ایس ٹی میں آتا ہے یہ پسماندہ لوگ ہوتے ہیں تو سرکار ان غریب لوگوں کے ساتھ کیوں ناانصافی کررہی ہے۔

ان کا کہنا ہے بجلی فیس تو یہ لوگ ادا کرتے ہیں، وہ بھی دگنا لیکن بجلی کا نظام اس قدر ناقص ہے کہ معمولی ہوائیں چلنے سے یہ بجلی کی ترسیلی لائنیں زمین پر گر جاتی ہیں اور ہفتے بھر بجلی غائب رہتی ہے لیکن محکمہ ان سے برابر بجلی فیس وصول کر رہا ہے۔

لوگوں کا کہنا ہے کہ انہوں نے بیک ٹو ولیج پروگرام پر کافی امیدیں رکھی تھیں، تاہم کوئی فائدہ نہیں ہوا۔

انہوں نے گورنر انتظامیہ سے مطالبہ کیا کہ گنڈکمال گاؤں کی طرف توجہ دینے کے لیے مداخلت کریں۔