بجلی کی عدم دستیابی کی وجہ سے عوام پریشان

وادی کشمیر میں سرما کی آمد کے ساتھ ہی بجلی بحران پیدا ہوجاتا ہے اور انتہائی تکلیف دہ کٹوتی شیڈول سے شہر و دیہات میں لوگوں کو مشکلات ومسائل کا سامنا کرنا پڑ رہا ہے۔

وہیں قصبہ پانپور کے لوگوں نے آج بجلی کی غیر ضروری کٹوتی کے خلاف احتجاجی مظاہرہ کیا۔

مظاہرین نے محکمہ پی ڈی ڈی پر الزام عائد کیا ہے کہ محکمہ کے ملازمین کی غیر ذمہ داری کی وجہ سے پانپور میں واقع پاور اسٹیشن کا 6.3 واٹ ٹرانسفارمر بار بار خراب ہو جاتا ہے۔

قصبہ پانپور کے لوگوں نے آج اے۔ڈی۔سی اونتی پورہ کے سامنے احتجاج کیا۔ انہوں نے کہا ہے کہ بجلی کی آنکھ مچولی سے نہ صرف عام لوگ متاثر ہو رہے ہیں بلکہ طلبا بھی متاثر ہوتے ہیں۔
انہوں نے کہا محکمہ پی۔ڈی۔ڈی اگرچہ ان سے ہر ماہ بجلی فیس کی وصولیابی کرتی رہتی ہے تاہم انہیں بجلی نہ ہونے کے برابر دی جا رہی ہے۔

انہوں نے حکام سے اپیل کی ہے ان کے علاقے میں بجلی کی سپلائی کو شیڈول کے مطابق بحال کریں۔

انہوں نے کہا کہ کہ اگر ان کے مطالبات کو پورا نہ کیا جائے تو وہ پرتشدد احتجاج کرنے پر مجبور ہوں گے ۔ اے۔ڈی۔سی نے لوگوں کو یقین دلایا کہ اُن کے مطالبات کو پورا کرنے کی وہ بھرپور کوشش کرینگے۔

انہوں نے اس معاملے میں اے۔ای۔ای پی۔ڈی۔ڈی کو طلب کیا اور اُن سے اس معاملے کو لے کر ضروری میٹنگ کی۔