بجلی کی عدم دستیابی سے عوام پریشان

جموں و کشمیر کے ضلع بارہمولہ میں پٹن چندر سیر علاقے کے لوگوں نے محکمہ بجلی کے خلاف احتجاج کیا۔

احتجاج کرنے والے لوگوں نے محکمہ بجلی پر الزام عائد کرتے ہوئے بتایا کہ پٹن چندر سیر گاوں کے لوگ گزشتہ کئی ہفتوں سے بجلی سے محروم ہیں جس کے نتیجے میں مقامی آبادی کو سخت مشکلات کا سامنا کرنا پڑ رہا ہے۔

ان کا کہنا تھا کہ وہ بجلی کی عدم دستیابی سے تنگ آ چکے ہیں اور انہیں محکمہ کی طرف سے مرتب کردہ شیڈول کے مطابق بھی بجلی فراہم نہیں کی جارہی ہے۔


مظاہرین کا کہنا ہے کہ بجلی نہ ہونے کی وجہ سے وہ اپنی بنیادی ضروریات کے کام پورے نہیں کر پا رہے ہیں۔

ایک طالبہ نے بتایا کہ بجلی نہ ہونے کی وجہ سے بچے رات کو پڑھ نہیں پاتے ہیں جس سے ان کی پڑھائی متاثر ہو رہی ہے۔

علاقے کے لوگوں نے ضلع کمشنر ڈاکٹر جی این یتو سے مطالبہ کیا ہے کہ جلد سے جلد بجلی سپلائی میں بہتری لائی جائے۔